Katrín Jakobsdóttir, forsætisráðherra hefur óskað eftir undanþágu frá lögum um varnir gegn hagsmunaárekstrum í Stjórnarráði Íslands til þess að gegna aukastarfi samhliða embættisstörfum sínum. Þetta kemur fram í umfjöllun Kjarnans um málið.
Aukastarfið sem Katrín þarf undanþáguna vegna er að setjast við skriftir en hún er að skrifa bók, nánar tiltekið glæpasögu, með hinum dáða metsöluhöfundi Ragnari Jónssyni. Eins og Kjarninn bendir á í umfjöllun sinni þá hefur engin leynd hvíld yfir verkefninu nema síður sé. Ragnar hefur til að mynda rætt um samstarfsverkefnið í viðtali við breska dagblaðið The Times.
Í byrjun árs 2021 tóku lögin um varnir gegn hagsmunaárekstrum í Stjórnarráði Íslands gildi en í þeim segir að störf æðstu stjórnenda og aðstoðarmanna ráðherra teljist full störf og óheimilt sé að sinna aukastörfum samhliða störfum í Stjórnarráði Íslands.
Samkvæmt lögunum getur ráðherra hins vegar veitt undanþágu ef fyrirhugað aukastarf telst til mannúðarstarfa, kennslu- eða fræðistarfa, vísindarannsókna, listsköpunar eða annarra og tilfallandi starfa. Það er þó aðeins ef aukastörfin hafa ekki áhrif á störf viðkomandi í Stjórnarráði Íslands og greiðslur fyrir aukastörfin teljast innan hóflegra marka.
Sá hængur er þó á að það er ráðuneyti Katrínar sjálfrar sem hefur eftirlit með því að lögunum sé framfylgt. Þess vegna var Bjarna Benediktssyni, fjármála- og efnahagsráðherra, falið að sjá um málið og ákveða hvort að Katrín fengi undanþáguna eða ekki. Bjarni liggur enn undir feldi og er að skoða málið.