Meirihluti kjósenda þeirra flokka sem eiga fulltrúa á Alþingi er fylgjandi aðild Íslands að NATÓ. Þetta á einnig við um kjósendur Sósíalistaflokksins og VG en báðir flokkar hafa á stefnuskrá sinni að Ísland segi sig úr NATÓ.

Fréttablaðið skýrir frá þessu í dag í umfjöllun um niðurstöður nýrrar skoðanakönnunar sem Prósent gerði.

Fram kemur að 71,6% svarenda styðji aðild að NATÓ en 11% eru á móti aðild.  17,3% hafa ekki skoðun á málinu.

Vinstri græn hafa að stefnu að Ísland segi sig úr NATÓ. Í því ljósi er er mjög athyglisvert að 53% kjósenda flokksins styðja aðild að NATÓ. Af þeim eru 20% mjög hlynnt aðild. 23% eru henni andvíg og 24% hafa ekki skoðun á málinu.

Í stefnu Sósíalistaflokksins kemur fram að mynda eigi friðarbandalag í samvinnu við nágrannaríki og smáþjóðir og verði það valkostur við NATÓ.  47% kjósenda flokksins styðja aðild að NATÓ en 40% eru á móti henni. 28% eru mjög andvíg aðild.

Kjósendur Viðreisnar eru þeir sem eru hlynntastir aðild að NATÓ en 93% þeirra styðja aðild og 4% eru á móti.

Nánar er hægt að lesa um málið í Fréttablaðinu í dag.