Einn af betri hópum Fésbókarinnar er án efa hópurinn „Algjörlega óáhugaverðar stjórnmálaupplýsingar“ en þar er gjarnan deilt upplýsingum um íslensk stjórnmál sem hafa takmarkað gildi í þjóðfélagsumræðunni og oft lítil praktísk not.
Hins vegar er nafn hópsins ekki alltaf réttnefni því oft eru þessar upplýsingar bara frekar áhugaverðar. Eins og í dag, en þá tók einn meðlimur, Baldur Karl Magnússon, lögfræðingur og starfsmaður þingflokks Pírata, sig til og tók saman í hvaða stjörnumerkjum allir þeir þingmenn sem tekið hafa sæti á Alþingi og þar með er komið á daginn að algengast er að íslenskir þingmenn séu tvíburar, en sjaldnast vatnsberar.
Af þeim 1218 einstaklingum sem tekið hafa sæti á Alþingi skiptast stjörnumerkin svona:
Fiskur – 91
Hrútur – 107
Naut – 108
Tvíburi – 125
Krabbi – 116
Ljón – 97
Meyja – 89
Vog – 115
Sporðdreki – 102
Bogamaður – 99
Steingeit – 94
Vatnsberi – 75
Önnur óáhugaverð áhugaverð staðreynd sem kom fram í athugasemd er að af þeim þremur flokkum sem mynda núna meirihluta á þingi, Sjálfstæðisflokkur, Vinstri Græn og Framsókn. Eru tveir formenn Vatnsberar, en það eru þau Katrín Jakobsdóttir forsætisráðherra og Bjarni Benediktsson fjármálaráðherra. Sigurður Ingi Jóhannsson, innviðaráðherra, er svo naut.
Uppfært: 15. júní klukkan 13:56
Blaðamaður hefur fengið skammir í hattinn fyrir að geta þess ekki að það var Baldur Karl Magnússon, starfsmaður þingflokks Pírata, sem tók saman þessa áhugaverðu tölfræðiupplýsingar. Blaðamaður tekur það til sín. Fyrirgefðu Baldur 🙁 Fréttin hefur verið uppfærð til að bæta úr þessu.