AOC er mjög áhrifamikil innan Demókrataflokksins en hún tilheyrir vinstri væng hans. Hún kom fram í State of the Union þætti CNN í gær og sagði þar að hún myndi ekki heita Biden stuðningi. Hún sagði að nú einbeiti hún sér að því að reyna að tryggja Demókrötum áframhaldandi meirihluta í fulltrúadeild þingsins en kosið verður um öll þingsætin í nóvember.
The Guardian segir að þegar hún var spurð beint hvort hún myndi styðja Biden hafi hún svarað að tekin verði afstaða í því máli þegar þar að komi. Ef forsetinn sé með stefnumál sem séu þess virði að vera skoðuðu verði málið skoðað þegar þar að kemur en nú snúist allt um að tryggja áframhaldandi meirihluta Demókrata í fulltrúadeildinni.
AOC er áberandi rödd á vinstri væng Demókrataflokksins og orð hennar hafa mikið vægi.
The New York Times sagði á laugardaginn að „tugir ósáttra embættismanna innan Demókrataflokksins, þingmenn og kjósendur“ hafi efasemdir um að Biden hafi það sem þarf til að snúa gengi flokksins við.
Tímaritið Intelligencer sagði í síðasta mánuði að margir af þeim sem láta mest fé af hendi rakna til Demókrataflokksins séu, svo lítt beri á, farnir að líta í kringum sig eftir öðrum frambjóðanda fyrir næstu forsetakosningar.
Stuðningur kjósenda við Biden er í algjöru lágmarki og hann virðist ekki finna leið út úr mörgum þeirra vandamála sem steðja að þjóðinni, þar á meðal eru verðbólga, þungarrofsmálin og síhækkandi framfærslukostnaður.
Demókratar eru með meirihluta í báðum deildum þingsins en það hefur ekki gert Biden kleift að koma ákveðnum málum sínum í gegnum þingið, þar á meðal lögum um kosningarétt. Mörgum þykir einnig vafasamt að tefla honum fram í næstu kosningum vegna aldurs hans en hann verður 82 ára tveimur vikum áður en gengið verður til kosninga.
