Yfirvofandi brottvísun 300 flóttamanna úr landi og útlendingafrumvarp Jóns Gunnarssonar dómsmálaráðherra hefur vakið mikla úlfúð og umræðu í samfélaginu. Davíð Þór Jónsson, sóknarprestur í Laugarneskirkju, er á meðal þeirra sem hafa tjáð sig um málið en hann er afar andvígur brottvísunum.
Davíð er harðorður í garð fyrirætlana ríkisstjórnarinnar og afstöðu hennar í málum flóttafólks. Hann kallar ríkisstjórn Katrínar Jakobsdóttur „fasistastjórn“ og segir hana hafa „migið á Barnasáttmála Sameinuðu Þjóðanna.“
„Þar er kveðið á um að allar ákvarðanir sem varði heill og hamingju barna beri að taka með hagsmuni þeirra að leiðarljósi. Samt á að senda fjölda barna úr langþráðu öryggi og skjóli hér á Íslandi, þvert á það sem þeim er fyrir bestu, til að hafast við í fullkomnu reiðuleysi á götum úti á Grikklandi, jafnvel þótt Flóttamannahjálp SÞ hafi af mannúðarástæðum lagst eindregið gegn því að fólk sé flutt þangað,“ bætir Davíð svo við.
Hann kallar útskýringar ráðamanna um að mynda heildstæða stefnu í málaflokkinum „innihaldslaust froðusnakk“ og ásakar VG um hræsni fyrir að leggjast ekki gegn þessum fyrirætlunum þrátt fyrir að hafa mikið gagnrýnt þessa stefnu þegar þau voru í stjórnarandstöðu.
„Þau eru einfaldlega sek eins og syndin. Það er sérstakur staður í helvíti fyrir fólk sem selur sál sína fyrir völd og vegtyllur.“
Birni Inga Hrafnssyni, sem kenndur er við fjölmiðil sinn Viljann, ofbýður þessi færsla Davíðs um málefnið. Í færslu sem Björn Ingi birti á Facebook-síðu sinni kallar hann Davíð „nettröll“ og „pínulítinn kall.“
„Ég hef andstyggð á því að fólk sem skotið hefur hér rótum og fengið vinnu sé sent úr landi. Og er bjartsýnn að finnist farsæl lausn. En feginn er ég að þetta nettröll sé ekki sóknarpresturinn minn,“ segir Björn Ingi í færslunni.
Björn skammar þá Davíð fyrir að hjóla í Katrínu Jakobsdóttur forsætisráðherra og vekur athygli á því að hún er fyrrverandi sambýliskona hans.
„Stóryrðin eiga að undirstrika málstaðinn og dyggðaskreytinguna, en í reynd er hér pínulítill kall að senda forsætisráðherranum, fyrrverandi sambýliskonu sinni, einstaklega ómerkilega skítapillu. Kennir ríkisstjórn hennar við fasisma og segir sérstakan stað í helvíti fyrir fólk eins og hana. Presturinn sjálfur! Ömurlegt.“
