Framsókn, Samfylking og Viðreisn í Mosfellsbæ hafa slitið viðræðum við Vini Mosfellsbæjar um myndun meirihluta. Viðræðum án Vina Mosfellsbæjar hefur verið haldið áfram og ganga þær, að sögn, vel. Þetta kemur fram í tilkynningu.

„Viðræður Framsóknar, Samfylkingar, Viðreisnar og Vina Mosfellsbæjar um myndun meirihluta í Mosfellsbæ hófust í vikunni. Það var eindreginn vilji til þess að láta á það reyna að mynda meirihluta með þátttöku allra þessara framboða. Viðræður leiddu hins vegar í ljós að ekki er til staðar sá samhljómur sem við teljum nauðsynlegan. Þar af leiðandi hefur verið tekin sú erfiða ákvörðun að slíta viðræðum við Vini Mosfellsbæjar. Framsókn, Viðreisn og Samfylkingin héldu áfram viðræðum í dag og hafa þær gengið mjög vel. Við vonumst til þess að geta átt gott samstarf á komandi kjörtímabili við alla flokka til hagsbóta fyrir alla Mosfellinga.“

Undir tilkynningu skrifa Halla Karen Kristjánsdóttir, oddviti Framsóknar í Mosfellsbæ, Lovísa Jónsdóttir, oddviti Viðreisnar í Mosfellsbæ og Anna Sigríður Guðnadóttir oddviti Samfylkingarinnar í Mosfellsbæ.

Ljóst er að Framsókn, sem er með fjóra bæjarfulltrúa, ásamt Samfylkingu og Viðreisn sem hvort um sig er með einn fulltrúa geta myndað minnsta mögulega meirihluta í Mosfellsbæ með sex bæjarfulltrúa.

Sjálfstæðisflokkurinn fékk fjóra menn kjörna og Vinir Mosfellsbæjar einn.