Dagur B. Eggertsson borgarstjóri greinir frá því í Facebook-færslu í dag að hann sé kominn í sóttkví. Hann hefur þó ekki sjálfur greinst með veiruna:
„Það fór þá aldrei svo að ég eða fjölskyldan færum í gegnum faraldurinn án þess að lenda í sóttkví. Allt er einu sinni fyrst. Eftir að eitt barnanna greindist með Covid heldur fjölskyldan til á heimilinu í alls konar fjarvinnu og fjarfundum – á öllum hæðum. Vonum að það versta sé afstaðið og aðrir hafa hingað til ekki smitast. Öllum líður vel.“
Dagur segir að fjölmiðlar hafi haft samband við hann í dag til að forvitnast um hvort hann hyggist gefa kost á sér fyrir borgarstjórnarkosningarnar í vor. Dagur gefur fyrirheit um svör um eða upp úr næstu helgi:
„Nokkrir fjölmiðlar hafa verið í sambandi í dag og gær til að spyrja um framboðsmál mín, minnugir þess að ég sagðist myndu gera grein fyrir þeim eftir hátíðar. Margir hafa verið í sambandi við mig um þau mál að undanförnu sem ég er þakklátur fyrir. Ég vona að það mæti skilningi að ég muni ekki segja frá niðurstöðu minni fyrr en sóttkví lýkur sem verður vonandi um helgina eða strax eftir helgi.“