Vilhjálmur Árnason, þingmaður Sjálfstæðisflokksins, sagði í ræðu sinni á Alþingi í dag að ríkisstjórnin hefði brugðist. Í henni fjallaði hann um sóttvarnaraðgerðir og umræðuna í kringum þær, sem honum finnst hafa verið einhliða.

„Við þurfum að þora að taka umræðuna frá mörgum sjónarhornum, en mér hefur fundist að eftir tveggja ára veru í faraldrinum, að hún einskorðist bara út frá sóttvarnarsjónarmiðunum. Maður finnur það almennt í samfélaginu að maður er að stíga inn á hættulega braut þegar maður fer að gagnrýna eitthvað, eða spyrja spurninga, en við verðum að taka þessa umræðu,“ sagði Vilhjálmur.

Í kjölfarið bætti hann við: „Ég verð nú bara að segja og taka undir það að ríkisstjórnin hafi að mörgu leyti brugðist í þessu.“ 

Þá sagði Vilhjálmur mikilvægt að eftirköst heimsfaraldursins yrðu rædd og minntist sérstaklega á atvinnulífið og fólk sem hefur misst vinnu vegna faraldursins.

Auk þess velti hann fyrir sér hvort heilbrigðisstarfsfólk sem hefði undanfarið unnið við skimanir væri betur nýtt á öðrum sviðum heilbrigðiskerfisins. „Við verðum að þora að taka þessa umræðu,“ sagði Vilhjálmur og kallaði til fjölmiðla, Alþingis og samfélagsins í heild sinni.