Expressen skýrir frá þessu. Fram kemur að komist hafi upp um konuna skömmu fyrir jól þegar hún setti þjófavarnarkerfið óvart í gang þegar hún var að þrífa heima hjá Andersson.
Konan er á þrítugsaldri. Umsókn hennar um dvalarleyfi hafði verið hafnað og því var hún á skrá lögreglunnar yfir þá sem þurfti að hafa upp á. Þegar lögreglumenn komu á vettvang á heimil Andersson áttuðu þeir sig á að konan var eftirlýst þegar þeir skoðuðu persónuskilríki hennar og önnur gögn.
Andersson segist hafa ráðið konuna til starfa í gegnum hreingerningarfyrirtæki sem hún hafi talið að hefði yfirlit yfir stöðu starfsfólks. Yfirmaður hreingerningafyrirtækisins segist ráða fólk til starfa frá hinum ýmsum ráðningarþjónustum og hafi treyst á að þær myndu tryggja að starfsfólkið væri með dvalarleyfi.
En eitthvað virðast málin vera loðin hjá hreingerningarfyrirtækinu því í ljós hefur komið að það hefur ekki gert kjarasamning við starfsfólkið og forstjóri þess hefur hlotið dóm fyrir skattsvik.
Öryggislögreglan Säpo segir það ekki sitt hlutverk að stýra því hverjir komi inn á heimil forsætisráðherrans. Þetta hefur farið illa í marga stjórnmálamenn sem spyrja sig hvert hlutverk öryggislögreglunnar er þá í að tryggja öryggi æðstu ráðamanna ríkisins.
Andersson er hissa á þessu öllu og segist þurfa að skoða þetta mál betur. En hvað sem því líður þá er ljóst að enginn vill taka ábyrgð á að konan hafi verið ráðin til starfa heima hjá henni án þess að vera með dvalarleyfi.
