Heilsa ehf. hefur ákveðið að fyrsta frá og með deginum í dag verð á vítamín- og bætiefnalínu sinni, sem seld eru undir merki Gula miðans.

Um er að ræða rúmlega 50 vörunúmer og ætlar Heilsa að halda veðrinu óbreyttu fram að áramótum til að styðja seljendur vörumerkisins í því að halda verðhækkunum í lágmarki innan sinna verslana og þannig sporna við frekari verðbólgu.

Þetta kemur fram í tilkynningu.

„Við teljum það vera skyldu okkar að leggja baráttunni gegn verðhækkunum lið. Heilsa Íslendinga skiptir okkur öllu máli og nú, þegar við finnum að fólk fer að halda að sér höndum, viljum við sjá til þess að slíkt ástand bitni ekki á heilsu fólks,“ segir Guðmundur Halldór Björnsson, sviðsstjóri heildsölu hjá Heilsu.

Þar með slæst Heilsa í hóp fyrirtækja sem ætla að halda vöruverði óbreyttu næstu mánuði og skorar Guðmundur á önnur fyrirtæki, sem hafi til þess burði, að gera slíkt hið sama.  

 „Við finnum öll hvernig verðbólgan er farin að hafa áhrif á heimilisbókhaldið. Stök fyrirtæki eða einstaklingar ná ekki að vinna bug á verðbólgunni, en með samhentu átaki getum við lagt baráttunni lið. Ef við tökum öll lítil skref í átt að sama markmiði þá er líklegra að við náum árangri.“

Fyrir viku síðan greind Krónan frá því að matvöruverslanir þeirra muni frysta verð á 240 vörum sem seld eru undir vörumerkjum Krónunnar og First Price. Þetta var eins gert til að sporna gegn verðbólgunni. 

Sjá einnig: Krónan frystir verð á 240 vörutegundum til að berjast gegn verðbólgunni

Heilsa ehf. er elsta fyrirtæki á Íslandi sem sérhæfir sig í innflutningi og dreifingu á heilsusamlegum og lífrænum matvörum, fæðubótarefnum, almennum og lífrænum snyrtivörum sem og vistvænum hreingerningarvörum. Guli miðinn er breið vítamín- og bætiefnalína sem hefur verið pökkuð og seld á Íslandi í yfir 30 ár. Undir Gula miðanum eru rúmlega 50 vörunúmer. Vörurnar má nálgast hjá rúmlega 30 verslana- og lyfsölukeðjum um land allt. Sjá meira um Gula miðann hér: https://gulimidinn.is/