Leonard-fjölskyldan, hjónin Arnfinnur Sævar Jónsson og Helga Daníelsdóttir og dætur þeirra, hefur hafið útleigu til ferðamanna á glæsilegum bústað sínum við Berufjarðarvatn, sem er um 48 kílómetra frá Búðardal. Bústaðurinn, sem nefnist Hafrahlíð, var skráður á bókunarsíðuna Booking.com í byrjun sumars.
Eins og myndirnar bera með sér er um tilkomumikla eign er að ræða en bústaðurinn var byggður árið 2019 og er um 240 fermetrar að stærð.
Athygli vekur að verðið er í hærra lagi en hver nótt kostar minnst 3.600 dollara, tæplega 500 þúsund krónur, en þá er miðað við fjóra gesti. Verðið er 4.500 dollarar eða um 620 þúsund krónur ef gestirnir eru átta talsins. Morgunverður er þó ekki innifalinn í þessu verði. Hægt er að panta hann sérstaklega fyrir 46 dollara, rúmar 6 þúsund krónur og er val um hefðbundinn dögurð eða vegan útgáfu.
Alls hýsir húsið átta gesti, eins og áður segir, í fjórum svefnherbergjum en hverju svefnherbergi fylgir baðherbergi. Þá er í bússtaðnum fullbúið eldhús, flatskjár með úrvali sjónvarpsstöðva, borðstofa og síðan stór verönd þar sem gestir geta notið útsýnis yfir Berufjarðarvatn.
Arnfinnur Sævar keypti landið árið 2006 ásamt viðskiptafélaga sínum, Ólafi Hauki Jónssyni en fyrirtækið Ellur ehf. eignaðist jörðina árið 2013 en sama félag er í dag skráð sem eigandi Leonard ehf – rekstrarfélags samnefndrar netverslunar.
Ellur ehf. er í eigu svissneska fyrirtækisins Hamar Inc. SA og er stjórnarformaður þess Heinz Peter Derendinger. Samkvæmt Fyrirtækjaskrá er félagið í endanlegri eigu systranna Gabríelu Rut Sævarsdóttur, Daníelu Söra Sævarsdóttur og Ísabellu Erna Sævarsdóttur, dætra Arnfinns Sævars og Helgu Daníelsdóttur.
Arnfinnur Sævar stofnaði verslunina Leonard árið 1991 og rak í tæpa tvo áratugi þar til hann var lýstur gjaldþrota árið 2010. Hann var dæmdur í eins árs fangelsi, þar af níu mánuði skilorðsbundna, árið 2015. Hann var sakfelldur fyrir að hafa komið fasteign á Flórída undan með því að framselja hana svissnensku félagi þar sem hann var stjórnarformaður. Þannig gátu lánardrottnar hans ekki gengið að fasteigninni.
