Fyrr í vikunni flutti Diljá Mist Einarsdóttir, þingkona Sjálfstæðisflokksins, ræðu þar sem hún fjallaði um störf þingsins í samnefndum lið. Síðasta þingfundi fyrir sumarfrí lauk á miðvikudaginn. Kjarninn greinir frá þessu.

Diljá sagði að hún væri mjög ánægð með störf þingsins og að „verða vitni að því frá fyrstu hendi hversu mikið alþingismenn þjóðarinnar brenna fyrir því að betrumbæta samfélagið okkar.“

„Alþingismönnum er umhugað um geðheilsu þeirra sem vinna við að hjálpa öðrum, vilja jafna stöðu fólks á vinnumarkaði og auðvelda og einfalda aðgengi að tæknifrjóvgunum,“ sagði hún einnig í ræðu sinni.

Ógn stafi af verðbólgu

Diljá Mist sagði að þingmenn væru auðvitað ekki alltaf sammála og mikill munur vera á hugarfari þingmanna gagnvart yfirvofandi efnahagsvandræðum.

„Munurinn á hugarfari þingmanna, hugsunarhætti og hugsjónum kemur hins vegar vel í ljós þegar við ræðum fjármálaáætlun næstu ára hér á þinginu. Þjóðin hefur glímt við næstmesta efnahagsáfall seinni tíma og það er ljóst að aðgerðir hafa skilað árangri og efnahagurinn hefur tekið hratt við sér. Hins vegar stafar okkur ógn af verðbólgu og versnandi efnahagshorfum í heiminum. Hvernig eigum við að bregðast við því?“ spurði hún.

Hvatti „harða hægrið“ til að láta í sér heyra

Diljá Mist lauk ræðunni með því að gagnrýna ákveðnar raddir á þingi sem hún segir amast við skattalækkunum og lækkunum gjalda undanfarinna ára.

„Efna­hags­stjórn und­an­far­inna ára hefur hins vegar sann­ar­lega stækkað kök­una. Um það verður ekki deilt. Hins vegar mættu stjórn­völd standa sig mun betur þegar kemur að aðhaldi og hag­ræð­ingu. Þar mætti vera meira af harða hægr­inu og ég hvet þau til að sitja á eilífri þörf til að hækka skatta og gjöld þegar kreppir að og fara ein­fald­lega betur með þær tekjur sem við heimtum af fólk­inu í land­in­u.“