Þrátt fyrir að Sjálfstæðismenn og Framsóknarmenn, sem mynda meirihluta í bæjarstjórn Hafnarfjarðar, bæti samanlagt við sig fylgi þá fellur meirihluti þeirra í kosningunum á laugardaginn ef miðað er við niðurstöður nýrrar könnunar sem Prósent gerði fyrir Fréttablaðið. Samfylkingin er í stórsókn og mun bæta við sig tveimur bæjarfulltrúum ef niðurstaða könnunarinnar gengur eftir. Mun flokkurinn þá fá fjóra bæjarfulltrúa en hann fékk tvo í síðustu kosningum.

Fylgi Samfylkingarinnar mælist nú 31% en hann fékk rúmlega 20% í síðustu kosningum. Það virðist sem Guðmundur Árni Stefánsson, oddviti flokksins og fyrrum bæjarstjóri og ráðherra, heilli Hafnfirðinga því 34% þeirra vilja sjá hann taka við bæjarstjóraembættinu að kosningum loknum.

Fylgi Sjálfstæðisflokksins mælist 34% sem er sama hlutfall og í síðustu kosningum en samt sem áður missir flokkurinn einn bæjarfulltrúa ef niðurstöður kosninganna verða á þessa leið.

Fylgi Framsóknarflokksins mælist 9% en það er einu prósentustigi meira en í síðustu kosningum.

Sjálfstæðisflokkur og Framsóknarflokkur mynda núverandi meirihluta í bæjarstjórn Hafnarfjarðar.

Fylgi Viðreisnar og Pírata mælist 7% og fær hvor flokkur einn bæjarfulltrúa kjörinn ef niðurstöður kosninganna verða þessar. Píratar eru ekki með bæjarfulltrúa í dag.

Meirihlutinn myndi því falla á einum fulltrúa ef þetta verða niðurstöður kosninganna.

Nánar er hægt að lesa um niðurstöður könnunarinnar á vef Fréttablaðsins.