Rannsóknarritstjóri Stundarinnar, Helgi Seljan, deildi á Twitter tveimur fyrirsögnum sem birtust í gær um fjármálaráðherra, Bjarna Benediktsson. Velti Helgi því fyrir sér hvort skeggið sem undanfarnar vikur hefur prýtt andlit ráðherrans væri reiðiskegg.

Ekki er óvanalegt að álíka grín birtist á Twitter. Það er sem óvenjulegt er að Bjarni svarar Helga þar sem hann gagnrýnir fyrirsagnirnar og segir þær uppspuna.

„Góður húmor. Ég hef gaman af húmor. Ég hef lítinn húmor fyrir því hins vegar þegar blaðamenn búa til fyrirsagnir sem eru uppspuni. Ég sagði aldrei heimskulegt að mæla fylgi. Svo dreifa menn uppspunanum. Ég klóra mér í skegginu og hugsa: Af hverju gera menn þetta? Fyrir smelli?“

Fréttin sem Bjarni vísar til birtist í gær og er unnin upp úr samtali Bjarna við Fréttavaktina á Hringbraut en þar var borin undir Bjarna niðurstaða könnunar sem Fréttablaðið lét gera fyrir sig, en samkvæmt þeirri könnun var fylgi Sjálfstæðisflokks komið undir 18 prósent. Bjarni var samhliða fræddur um að miðað við kannanir hefði ríkisstjórnin talað töluvert mörgum þingsætum og þá svaraði Bjarni:

„Mér finnst þetta heimskuleg nálgun að reyna að reikna þingsæti þegar það er ekki eitt ár frá kosningum. Það eru þrjú ár í kosningar. Svo það að reyna að reikna út þingsæti og segja að einhvern hafi tapað þingsætum.. við höfum engum þingæstum tapað. Við erum með þau öll og verðum með þau i þrjú ár í viðbót.“ 

Svo líklega er Bjarni í svari sínu til Helga að vísa til þess að hann hafi ekki sagt að það væri heimskulegt að mæla fylgi, heldur að mæla fjölda þingsæta.

Góður húmor. Ég hef gaman af húmor. Ég hef lítinn húmor fyrir því hins vegar þegar blaðamenn búa til fyrirsagnir sem eru uppspuni. Ég sagði aldrei heimskulegt að mæla fylgi. Svo dreifa menn uppspunanum. Ég klóra mér í skegginu og hugsa: af hverju gera menn þetta? Fyrir smelli?

— Bjarni Benediktsson (@Bjarni_Ben) April 28, 2022