Jóna Sveinsdóttir, ræstitæknir og kjólameistari, sagði sig úr stjórn Eflingar í gærkvöld í kjölfar þeirrar ákvörðunar meirihluta stjórnarinnar um að segja upp öllu starfsfólki Eflingar.

Jóna hefur lengi starfað í verkalýðshreyfingunni og verið dyggur stuðningsmaður Sólveigar Önnu. Hún segir í samtali við DV að ákvörðunin um að yfirgefa stjórnina hafi verið tekin fyrir nokkru en nýjustu vendingar hafi flýtt fyrir henni og séu hluti af ástæðunni fyrir því að hún stígur til hliðar. Viðurkennir hún að vinnubrögð nýrrar stjórnar séu ekki í takt við hennar sjónarmið.

„Þessi ákvörðun var tekin áður. Ég er ekki tilbúin til að tímasetja hana nákvæmlega,“ segir Jóna. „Við erum sammála í pólitík,“ segir hún, aðspurð um afstöðu sína til Sólveigar Önnu Jónsdóttur, formanns Eflingar, sem stóð að baki þeirri ákvörðun að reka starfsfólkið. Hún viðurkennir hins vegar að það sé vegna stefnu nýrrar stjórnar undir forystu Sólveigar Önnu sem hún vill ekki vera í stjórn Eflingar lengur.

„Ég styð ekki þessa ákvörðun,“ segir Jóna ennfremur um þá ákvörðun að segja upp starfsfólkinu. „Afsagnarákvörðunin var samt tekin áður.“

„Öllum mínum afskiptum af Eflingu stéttarfélagi er hér með lokið,“ segir Jóna ennfremur en hún hefur nógu öðru að sinna enda er hún bæði kjólameistari og ræstitæknir.