Ingveldur Sæmundsdóttir, aðstoðarmaður Sigurðar Inga Jóhannssonar, innviðaráðherra, segir það af og frá að ráðherrann hafi viðhaft rasísk ummæli á gleðskap í tilefni af Búnaðarþingi í vikulok. „Þetta er algjört bull,“ segir Ingveldur.

Sú saga hefur farið sem eldur um sinu alla helgina að tvær uppákomur hafi átt sér stað á umræddum gleðskap. Annarsvegar að Sigurður Ingi hafi vísað til Vigdísar Häsler, framkvæmdastjóra Bændasamtakanna  sem „hinnar svörtu“ og að soðið hafi upp úr milli Gunnars Þorgeirssonar, formanns BÍ, og Lilju Daggar Alfreðsdóttur, menningar- og viðskiptaráðherra Framsóknarflokksins.

Þess ber að geta að blaðamenn DV höfðu það frá heimildarmönnum sem voru á vettvangi að að Sigurður Ingi hefði látið ummælin falla og sú saga hefur farið sem eldur um sinu alla helgina.

Sjá einnig: Leiðtogar Framsóknar í vandræðum eftir uppákomur á Búnaðarþingi – Formaðurinn BÍ rekinn burt og rasísk ummæli sögð höfð uppi

Ingveldur vísar því hins vegar alfarið á bug. Hún segist ekki hafa neytt áfengis þetta kvöld og staðið við hlið Sigurðar Inga þegar til stóð að taka mynd þar sem viðstaddir ætluðu að halda á Vigdísi í einskonar planka. Segir Ingveldur að Sigurði Inga hafi ekki litist vel á hugmyndina og þá látið þau orð falla að hann vildi ekki halda á Sjálfstæðismanni.