Prófkjör Sjálfstæðismanna í Reykjavík vakti töluverða athygli um helgina og niðurstöður úr því sömuleiðis. Ekki eru allir Sjálfstæðismenn himinlifandi með niðurstöðuna en Egill Þór Jónsson, borgarfulltrúi Sjálfstæðisflokksins, er einn þeirra sem er svekktur. Egill Þór, sem er úr Breiðholtinu, vill meina að prófkjörið hafni fulltrúum úthverfa og má vel vera að eitthvað sé til í því.

Í efstu 6 sætum listans eru nefnilega 5 einstaklingar sem koma allir af sama svæðinu, úr Miðbænum og Vesturbænum. Miðað við niðurstöður úr skoðanakönnun sem Maskína gerði fyrir Vísi í mánuðinum mun Sjálfstæðisflokkurinn ná inn 6 borgarfulltrúum í kosningunum í vor.

Efstu 6 sætin verma þau Hildur Björnsdóttir, Ragnhildur Alda María Vilhjálmsdóttir, Kjartan Magnússon, Marta Guðjónsdóttir, Björn Gíslason og Friðjón R. Friðjónsson. Dreifingin á þessum 6 efstu á listanum er ekki mikil þar sem öll nema Björn búa í póstnúmerum 101, 102 og 107 í Reykjavík, öll í Vesturbænum. Björn er eini sem býr fyrir utan það svæði og býr hann lengst frá miðpunkti höfuðborgarinnar af þessum 6, í 110 Reykjavík.

Egill Þór skýtur á þettta í færslu sem hann birti á Facebook-síðu sinni eftir að niðurstöður úr prófkjörinu lágu fyrir:

„Flokknum bíður krefjandi verkefni fyrir næstu kosningar. Við sem tókum þátt fyrir fjórum árum sátum á fjölbreyttum lista er varðar dreifingu milli póstnúmera og bakgrunn. Úrslit á kjördegi 2018 skiluðu yfir 30% fylgi fyrir flokkinn í fyrsta sinn í Reykjavík í langan tíma. Þetta prófkjör hafnar fulltrúum úthverfa, þar sem flokkurinn sækir fylgi sitt hvað mest. Það vekur upp spurningar.“

Egill sóttist eftir 6. sæti á listanum en fékk ekki eitt af 11 efstu sætunum í prófkjörinu. Það er því harla ólíklegt að hann myndi komast inn sem borgarfulltrúi og því segist hann kveðja borgarmálin í færslunni. Þrátt fyrir niðurstöðuna óskar hann nýja listanum til hamingju með kjörið og auk þess þakkar hann þeim sem studdu hann síðustu vikur og mánuði í hans verkefnum.