Ingibjörg Sólrún Gísladóttir, fyrrverandi utanríkisráðherra og fyrrverandi staðgengill sérstaks fulltrúa aðalframkvæmdastjóra Sameinuðu þjóðanna í Írak, var gestur Sigríðar Hagalín í Silfrinu á RUV í dag þar sem stríðið í Úkraínu var helsta umræðuefnið.
Sigríður spurði Ingibjörgu hvort við ættum að fara fram á það við Nato að hér yrði föst viðvera herliðs en Ingibjörg sagðist ekki sjá ástæðu til þess nema við væru að horfast í augu við þriðju heimsstyrjöldina.
Sigríður benti á að við stæðum nú frammi fyrir nýjum veruleika, nýju tímabili í mannkynssögunni þar sem átakalínur og áhrifasvæði væru að færast til. „Hvernig heldurðu að heimurinn, þessi stóra geópólitíska mynd, hvernig heldurðu að heimurinn líti út að þessu loknu?“ spurði hún Ingibjörgu sem sagði í raun ekki nokkra leið að svara þessu, en sagði þó: „Ég held að heimurinn verði ekki samur, svo mikið er víst.“ Ingibjörg benti á að allt væri breytt og hún sæi ekki hvernig við ættum að búa til eðilegt samband við Rússland úr þessu. Stríðið hafi ekki aðeins áhrif á Úkraínu heldur fari það líka mjög illa með Rússland. „Það mun enginn treysta Rússum í nánustu framtíð. Þeir geta nánast ekki setið við sama borð og aðrir í viðræðum um stöðu mála,“ sagði hún.
Þá sagði Ingibjörg ýmis teikn á lofti, til að mynda í Kína þar sem forsetinn Xi Jinping sé einráður. Einræðsitilburðir hefðu einnig sést hjá Erdogan, forseta Tyrklands, sem og forseta Ungverjalands, til viðbótar við Pútín í Rússlandi.
„Þeir eru í genakeðjunni með gamla heimsveldið, það eru rússneska keisaradæmið, kínverska miðríkið, það er Ottómanveldið og austurrísk-ungverska keisaradæmið. Þetta er rosalega hættuleg blanda og þarna koma upp gerræðislegir stjórnarhættir í ríkjum sem eiga svona gamla sögu. Við þurfum að vera á varðbergi,“ segir Ingibjörg.
