Þann 19. febrúar næstkomandi verður bindandi íbúakosning á Blönduósi og í Húnavatnshreppi um sameiningu sveitarfélaganna. Ef íbúar kjósa með sameiningu munu sveitarfélögin bjóða fram sameinuð í bæjar- og sveitarstjórnarkosningunum í vor.

„Það fóru af stað stórar samningaviðræður um sameiningu fjögurra sveitarfélaga árið 2019-20 en tvö sveitarfélag höfnuðu sameiningu, Skagabyggð og Skagaströnd. Húnavatnshreppur fór í skoðanakönnum í tengslum við alþingiskosningarnar síðustu og reyndust 65% íbúa hlynntir sameiningarviðræðum þessara tveggja sveitarfélaga. Þá fóru samningaviðræður af stað um sameiningu Blönduóss og Húnavatnshrepps,“ Valdimar O Hermannsson, sveitarstjóri Blönduóssbæjar.

„Þetta er úrslitastund. Ef sameiningin verður samþykkt þá verður boðið fram sameiginlega fyrir sveitarstjórnarkosningarnar í maí,“ segir Valdimar ennfremur en hann er hlynntur sameiningu og talar fyrir henni þó að með því sé hann að vinna að því að starf hans verði lagt niður. „Ég er hlynntur sameiningu sveitarfélaganna, þetta er partur af því að ná utan um rekstur þeirra og það sem sveitarfélög eru að gera, að þetta séu stærri og öflugri einingar. Þetta er óumflýjanleg þróun,“ segir sveitarstjórinn.