Ágúst Bjarni Garðarsson, alþingismaður Framsóknarflokksins, formaður bæjarráðs og varaformaður skipulags- og byggingarráðs Hafnarfjarðar, var gestur í Kastljósi á RÚV í gærkvöldi en þar ræddi hann ásamt Kristrúnu Frostadóttur, þingmanni Samfylkingarinnar, um húsnæðisverð og aukna verðbólgu.

Í þættinum sagði Ágúst meðal annars að ástæða hækkandi íbúðaverðs væri skortur á íbúðum og lóðum á höfuðborgarsvæðinu og of hátt lóðaverð.

Þessi orð hans vöktu athygli Stefáns Más Gunnlaugssonar, varabæjarfulltrúa Samfylkingarinnar, sem skrifaði pistil um málið en pistillinn birtist á Vísi í dag. „Gagnrýndi hann Reykjavík í þeim efnum. En passaði sig á því að nefna ekki vægast sagt dapra stöðu í Hafnarfirði í þessum efnum – í hans eigin heimabæ, þar sem hann hefur farið með völd síðustu fjögur árin með Sjálfstæðisflokki,“ segir Stefán í pistlinum.

Stefán segir þá að Ágúst hefði átt að líta sér nær. Hann sem forystumaður og samstarfsmaður Sjálfstæðisflokksins í meirihluta í Hafnarfirði hefði átt að nefna þá staðreynd, að fólki hefur fækkað í Hafnarfirði. Og ástæðan sú sem bæjarfulltrúinn nefndi sjálfur: Skortur á íbúðum og lóðum í Hafnarfirði!“

„Það var svo sannarlega skorað sjálfsmark í Kastljósinu í gær“

Stefán segir að í Reykjavík og í öðrum nágrannasveitarfélögum Hafnarfjarðar hafi verið eðlileg fólksfjölgun á síðustu árum. „Þar hefur verið framboð. En ekki í Hafnarfirði,“ segir hann og vekur athygli á því að íbúum Hafnarfjarðar fækkaði fyrir tveimur árum síðan.

„Eftir stöðugan vöxt í 80 ár, þá fækkaði íbúum Hafnarfjarðar í fyrsta skiptið árið 2020 og íbúaþróun er langt undir viðmiðunum og áætlunum.“

Stefán segir Framsóknarflokkinn bera ábyrgð á þessu ásamt Sjálfstæðisflokknum. „Ábyrgðin á sleninu og skipulagsleysinu er alfarið Framsóknarflokks og Sjálfstæðisflokks, þegar kemur að húsnæðismálum,“ segir hann.

„Í Hafnarfirði og ekki síður landsstjórninni, þar sem þessir sömu flokkar stjórna. Umbótatillögur Samfylkingarinnar liggja fyrir á landsvísu, svo sem stórhækkun húsnæðis- og vaxtabóta. Í Hafnarfirði munu jafnaðarmenn setja íbúðamálin í forgang vinni þeir sigur í bæjarstjórnarkosningunum í vor.“

Að lokum segir hann að Ágúst hafi skorað sjálfsmark í þessum þætti af Kastljósi. „Í fótboltanum gerist það stundum, að leikmenn slysast til að skjóta boltanum í eigið mark. Það er kallað sjálfsmark. Það var svo sannarlega skorað sjálfsmark í Kastljósinu í gær.“