Björgvin Páll Gústavsson, landsliðsmaður í handbolta, sækist eftir 1.-2. sæti hjá Framsókn í Reykjavík.

„Mig langar að taka ábyrgð á því að gæta velferðar barna og annara viðkvæmra hópa í samfélaginu. Að auki þá hafa málefni barna snertiflöt við nánast allan rekstur borgarinnar og mynda einn helsta útgjaldalið sveitarfélagins. Börn eru ekki með kosningarétt og þeim sem stjórna er falið mjög mikilvægt hlutverk sem snýr að velferð barna. Það má gera betur þegar kemur að því að forgangsraða réttindum og velferð barna með sýnilegri stefnumótun og ákvörðunartöku,“ segir Björgvin Páll á Facebooksíðu sinni.

Þá hefur Björgvin Páll verið ófeiminn við að tala um oddvita flokksins í borginni sem „borgarstjóraefni.“ Hann skýrir þetta í færslunni: „Ástæða þess að ég hef verið að notast við orðavalið “borgarstjóraefni” er til að gera fólki grein fyrir þeirri trú sem ég hef á Framsókn fyrir þessar kosningar og vil ég vera hluti af þeirri vegferð, hvort sem það væri að leiða flokkinn eða í öðru sæti á lista.“