Á síðustu mánuðum hafa umsvif Bandaríkjahers á Keflavíkurflugvelli farið vaxandi og setja æ sterkari svip á völlinn. Mikil umskipti hafa orðið á síðustu misserum og má sjá þau í aukinni umferð herflugvéla, fleiri ökutækjum sem þjónusta vélarnar og önnur umsvif við stóra flugskýlið suðaustan við Leifsstöð en þar er aðstaða fyrir herinn til að búa flugvélar sínar til flugs.

Fréttablaðið skýrir frá þessu í dag. Friðþór Eydal, fyrrum upplýsingafulltrúi varnarliðsins á Keflavíkurflugvelli, sagði að Bandaríkjamenn hafi aukið viðveru sína hér á landi verulega síðan þeir tóku nýjar kafbátaleitarflugvélar í notkun fyrir nokkrum árum. „Nú í seinni tíð hefur herinn verið með allt upp undir sjö leitarvélar í einu, en hverri vél fylgir ekki aðeins tíu manna áhöfn heldur og fjölmennt stuðningslið. Það má segja að herinn sé að byggja upp aðstöðu sína á vellinum frá grunni eftir að hann yfirgaf völlinn haustið 2006, en þessum nýju kafbátaleitarvélum fylgir mikil þjónusta – og hún fer vaxandi,“ er haft eftir honum.

Albert Jónsson, fyrrum sendiherra og sérfræðingur í alþjóðamálum, sagði að fleiri æfingar og eftirlit hafi valdið auknum umsvifum á vellinum. Til dæmis hafi verið flogið daglega frá Keflavík austur yfir Eystrasalt vegna deilna Rússa og Úkraínumanna.