Sky News skýrir frá þessu. „Ég reikna með að hann ráðist inn, hann verður að gera eitthvað,“ sagði Biden um fyrirætlanir Vladímír Pútíns, Rússlandsforseta, varðandi Úkraínu. Hann sagðist einnig telja að Pútín muni láta reyna á viðbrögð Vesturlanda, Bandaríkjanna og NATO. „En ég held að hann muni greiða þetta dýru verði en hann heldur að þetta muni ekki kosta hann neitt. Ég held líka að hann muni sjá eftir þessu,“ sagði Biden einnig.
Bandaríkin og Vesturlönd hafa hótað Rússum hörðum refsiaðgerðum ef þeir ráðast á Úkraínu og sagt að þær verði svo harðar að Rússar hafi aldrei séð neitt þeim líkt.
Þegar Biden var spurður hvort það muni draga úr refsiaðgerðum ef um takmarkaða innrás verður að ræða gaf hann í skyn að svo kynni að fara. Hann sagði að Rússar verði látnir sæta ábyrgð ef þeir ráðast á Úkraínu. Eðli refsiaðgerðanna muni fara eftir aðgerðum þeirra. Ef þeir geri það sem þeir geta með því herliði sem þeir hafa safnað við úkraínsku landamærin muni það kalla hörmungar yfir Rússland.
Að fundi loknum sögðu ráðgjafar Biden að hann hafi verið að ræða um viðbrögð við mismunandi tegundum árása, árás hers eða annarskonar árás, til dæmis tölvuárás eða árás málaliða eða uppreisnarmanna sem njóta stuðnings Rússa. Það verði brugðist við slíkum árásum á viðeigandi hátt.
