Gengi hlutabréfa skráðra fyrirtækja í Kauphöll Íslands er á fleygiferð upp á við í morgun. Að sögn Sveins Þórarinssonar, greinanda hjá Landsbankanum, er þetta fyrst og fremst markaðurinn að jafna sig eftir kosningaskjálfta síðustu daga. „Markaðurinn vill stöðugleika,“ segir Sveinn og bendir á að einhver lækkun hafi átt sér stað síðustu daga. Nú þegar líkur eru á áframhaldandi ríkisstjórn Sjálfstæðisflokks, Framsóknarflokks og Vinstri grænna, sjá markaðir fram á pólitískan stöðugleika og fyrirsjáanleika.

Nokkur samhljómur virðist vera meðal greinenda um ástæður hækkana á mörkuðum í morgun. Segir Alexander Freyr Einarsson, fyrrum viðskiptablaðamaður á Viðskiptablaðinu, á Twitter í morgun að hagur lífeyrissjóða hafi vænkast um milljarða, „þökk sé almennri skynsemi þjóðarinnar í kjörklefanum.“

Hagur lífeyrisþega vænkast um milljarða þökk sé almennri skynsemi þjóðarinnar í kjörklefunum. pic.twitter.com/bVBtCXOQ9T

— Alexander Freyr (@alexander_freyr) September 27, 2021

Sveinn bendir þó á að þrátt fyrir grænar tölur þvert yfir töfluna hjá Kauphöllinni nú í morgunsárið geri hann ráð fyrir að jafnvægi muni komast á markaðinn á næstu dögum og að gengið er harla á leið í tölur sem ekki hafa áður sést. Þá segir hann jafnframt um litla veltu að ræða, enn sem komið er.

Mesta velta hefur í morgun verið með bréf í Kviku banka, sem hafa hækkað um tæp 6%, og bréf Arion banka sem hafa hækkað um 4,5%.

Þá vekur athygli að sjávarútvegsfyrirtækin Brim, Iceland Seafood og Síldarvinnslan hafa hækkað mjög ríflega, eða á bilinu 4,5-7%.