Alþingiskosningarnar nálgast óðfluga en gengið er til kosninga á laugardaginn, þann 25. september næstkomandi. Ljóst er að harka er farin að færast í kosningabaráttuna sem sést best á skoti kosningastjóri Vinstri grænna á nýja auglýsingu Samfylkingarinnar.
Allt hófst þetta með því að Sigríður Gísladóttir, sem skipar þriðja sæti lista Vinstri grænna í norðvesturkjördæmi í komandi alþingiskosningum, birti færslu á Twitter þar sem hún sagði að ný auglýsing Samfylkingarinnar væri „þeirra Tab gegn okkar Coke“. Sigríður bætti svo við grenjuhlæjandi tjákni (e. emoji).
Þeirra Tab gegn okkar Coke. 😂 https://t.co/smDhZ0pC0p
— Sigríður Gísladóttir (@siggagisla) September 21, 2021
Einhver líkindi eru vissulega með auglýsingu Samfylkingarinnar og auglýsingu sem VG birti fyrir rúmri viku síðan. Báðar auglýsingarnar sýna svipmyndir af Íslendingum og úr íslenskri náttúru og báðar eru þær með fallegt lag sem á eflaust að kveikja einhvern innblástur hjá áhorfendum.
Auglýsingarnar svipa þó í grunninn báðar til margra annarra kosningaauglýsinga sem gerðar eru og því kemur afskaplega lítið á óvart að þær séu einmitt nokkuð svipaðar, sérstaklega í ljósi þess að báðir flokkarnir eru á vinstri vængnum.
XV 25. september pic.twitter.com/ueED7x8cZH
— Vinstri græn (@Vinstrigraen) September 14, 2021
Anna Lísa Björnsdóttir, kosningastjóri VG, birti athugasemd undir færslunni sem flokksystir hennar birti. Þar lýsti hún auglýsingu Samfylkingarinnar sem „hinni The Shining“.
Fruss. Smá fyndið. Eins og að horfa á hina the Shining.
— Anna Lisa (@annelibjorns) September 21, 2021
Þessi athugasemd Önnu Lísu fór vægast sagt öfugt ofan í Rósu Björk Brynjólfsdóttur, þingmann og frambjóðanda Samfylkingarinnar í Reykjavík suður, sem svarar athugasemdinni og segir skrif VG-kvennanna ekki vera smekkleg. „Æ í alvöru stelpur. Það er nú ekki mjög smekklegt að skrifa svona um auglýsingu þar sem börn eru áberandi,“ segir Rósa.
„Margur heldur mig um sig,“ segir þá Anna Lísa og birtir athugasemd sem maður nokkur birti við kosningauglýsingu VG. „Þetta er mögulega mesta ógeð sem ég hef séð. Ógeð, ógeð, ógeð, ógeð, ógeð. Ótrúlegt,“ skrifaði sá maður í athugasemdinni.
Rósa bendir Önnu Lísu þá á að maðurinn sem skrifaði athugasemdina sé ekki í framboði fyrir Samfylkinguna og það sé allt annað að einhver aðili skrifi svona og kosningastjóri flokks í framboði.
Þú sem kosningastjóri VG ert að lýsa auglýsingu þar sem þrjú börn og fötluð móðir kemur fyrir sem “hina the Shining” hryllingsmynd sem er ótrúlega ósmekklegt. Svarar svo með skætingi með einhverju sem maður sem ég þekki ekki,er ekki í framboði fyrir Samfylkinguna skrifa eh.staðar
— Rósa Björk B (@RosaBjorkB) September 22, 2021
Anna Lísa svarar Rósu þá og segir að hún sé að afbaka athugasemd sína. Hún segir þá að með líkingunni við „hina The Shining“ hafi hún verið að meina að kosningaauglýsing VG sé meistaraverk, ólíkt kosningaauglýsingu Samfylkingarinnar.
Já sæl – ætlar þú í alvöru að afbaka kommentið mitt svona. Það var gert meistaraverk og svo ekki meistaraverk. Það er það sem ég er að tala um og ég frábið mér þessi samskipti.
— Anna Lisa (@annelibjorns) September 22, 2021
