Bjarkey Olsen Gunnarsdóttir, þingmaður Vinstri Grænna, birti í gær færslu á Facebook þar sem hún deildi niðurstöðum nýs Þjóðarpúls Gallups þar sem fylgi Vinstri Grænan fór úr 17% yfir í 10% og sagði að skilaboðin til Vinstri Grænna væru skýr – þjóðin vildi flokkinn ekki í ríkisstjórn.

„Skila­boðin eru skýr, fylgið fer úr 17% í 10% og því ljóst að vilji er til þess að aðrir taki við kefl­inu.“ 

Katrín Jakobsdóttir, forsætisráðherra, sagði í samtali við RÚV að færsla Bjarkeyjar lýsti ekki afstöðu Vinstri Grænna, þeir væru tilbúnir að mynda ríkisstjórn sama hvert fylgið væri.

„Í fyrsta lagi er það þannig að við tökum ekki ákvörðun um þetta fyrr en niðurstöður kosninga liggja fyrir. Skoðanakannanir, eins góðar og þær nú eru, ráða ekki för okkar í þessum málum enda má sjá það að þær eru ansi breytilegar dag frá degi þessa dagana og margir flokkar sem liggja þétt saman í aðdraganda kosninga. Þannig að það er alveg óbreytt afstaða okkar í VG. Við erum reiðubúin að mynda ríkisstjórn um þau málefni sem við setjum á oddinn.“

RÚV spurði Katrínu hvort einhver í forystu flokksins hafði haft afskipti af færslu Bjarkeyjar. Svaraði Katrín því til að málfrelsi ríkti innan raða flokksins. Var hún þá spurð hreint út hvort hún hafi beðið Bjarkeyju að fjarlægja færsluna.

„Ég ræddi við Bjarkeyju um færsluna af því að það voru frekar skiptar skoðanir innan hreyfingarinnar um þessi skilaboð.“