Undanfarna viku hefur Miðflokkurinn eytt meiru í auglýsingar á Facebook en nokkur annar stjórnmálaflokkur eða rétt tæpri 1,8 milljón á undanförnum 7 dögum. Þetta kemur fram í samantekt á kostuðum birtingum stjórnmálaflokkanna sem Facebook veitir.
Næstur á eftir kemur Flokkur fólksins, sem eyddi 676.447 krónum á sama tímabili. Flokkur fólksins og Miðflokkurinn skipa sér þannig í algjöran sérflokk. Ef skoðuð er eyðsla í Facebook auglýsingar síðustu 30 daga raða þessir sömu flokkar sér í efstu tvö sætin á ný. Miðflokkurinn með um 2,1 milljóna útgjöld og Flokkur fólksins með um 1,5 milljónir.
Þannig er ljóst að Miðflokkurinn hefur spýtt duglega í lófana síðustu daga og rúmlega fimm faldað útgjöld sín í Facebook auglýsingar frá því sem áður var. 85% útgjalda flokksins í Facebook auglýsingar hafa orðið til á síðustu 7 dögum. Sama hlutfall hjá hinum flokkunum er undir 50% nema hjá Pírötum og Sósíalistum. Píratar eyddu nánast engu þangað til í þessari viku, en 95% af útgjöldum þeirra undanfarna 30 daga, hafa orðið á undanförnum 7 dögum. Sama hlutfall er 69% hjá Sósíalistum.
Útgjöld flokkanna í auglýsingar á Facebook og Instagram undanfarna 7 daga má sjá hér að neðan:
Þá gera einstaka frambjóðendur og framboð flokkanna í einstaka kjördæmum jafnframt sínar eigin Facebook síður út og kosta sumar þeirra birtingu auglýsinga. Af einstaklingum hefur Ásmundur Einar Daðason eytt mestu eða um 90 þúsundum. Næstur þar á eftir kemur Píratinn Gísli Rafn Ólafsson, með rétt tæpar 40 þúsund krónur.