Sigurður Ingi Jóhannsson, ráðherra og formaður Framsóknar og Þorgerður Katrín Gunnarsdóttir, formaður Viðreisnar, tókust á í pallborðsumræðum á RÚV í kvöld. Þar var rætt um heilbrigðismál, en spurningin sem kveikti á umræðum þeirra beindist að Sigurði og var þessi: „Styðjið þið Framsóknarmenn frekari einkarekstur í heilbrigðisþjónustunni?“
„Við skulum bara segja það þannig að þessir biðlistar sem uppi eru í dag, við hefðum verið þeirrar skoðunnar að það ætti að vinna þá niður, til að mynda með þjónustusamningum við aðila á Íslandi,“ sagði Sigurður og benti síðan á Danmörku sem dæmi þar sem fólk geti leitað til einkaaðila og látið ríkið borga ef ríkisrekna heilbrigðiskerfið bregst ekki við eftir ákveðið langan tíma.
Þá spurði Þorgerður Katrín hann Sigurð: „Hefur heilbrigðisráðherra tekið vel í þetta?“ og gaf þar með í skyn að það sem hann væri að segja væri ekki í samræmi við stefnu ríkisstjórnarinnar. Sigurður svaraði: „Við erum að fara í kosningar, er það ekki? Erum við ekki að fara í kosningar?“
Í kjölfarið töluðu Þorgerður og Sigurður ofan í hvort annað, sem endaði með því að Þorgerður spurði „Er þetta eitthvað viðkvæmt Sigurður?“ og hann svaraði um hæl „Nei þetta er ekki viðkvæmt, þetta er óskiljanlegt!“
Þá bættist Þórhildur Sunna í umræðuna og spruði Sigurð: „Þetta er yfirlýst stefna. Á ekki að taka mark á ykkar yfirlýstu stefnu? Ertu að segja okkur það?“, en Sigurður hélt áfram: „Þetta er óskiljanleg yfirlýsing af ykkar hálfu.“
Sigurður Ingi fjallaði þá í kjölfarið um að heilbrigðismálin væru flókin og að hann sæi að allir flokkarnir áttuðu sig á því, og náði þar með að róa andrúmsloftið.