Björn Leví Gunnarsson, þingmaður Pírata, segir það ekki vera stjórnvöldum eða Þórólfi Gunnarssyni sóttvarnalækni að kenna að smit séu að leka til Íslands í gegnum landamærin heldur sé það ríkisstjórninni að kenna. Hann ræðir þetta í pistli sem hann skrifar í Morgunblaðið.
Í viðtali við Kjarnann segir Þórólfur að hann hafi viljað sjá betri stjórn á landamærunum en að það hafi ekki verið hægt.
„Landspítalinn er á hættustigi og sóttvarnalæknir segir að ekki hafi verið hægt að hafa betri stjórn á landamærunum. Við hljótum að þurfa að spyrja „af hverju?“ Af hverju er Landspítalinn á hættustigi? Af hverju var ekki hægt að hafa betri stjórn á landamærunum? Eina svarið við þessum spurningum er „ríkisstjórnin“,“ segir Björn en hann vill meina að ríkisstjórninni hafi mánuðum saman mistekist að bregðast við álagi á spítalann og að nú sé efnahagsleg áætlun hennar að mistakast líka.
Hann segir að eftir að faraldurinn skall á í fyrra hafi verið ákveðið að setja þrjá milljarða í markaðsátak fyrir ferðaþjónustuna og opna síðan landamærin fyrir ferðamönnum. Í kjölfar þess hafi komið önnur og þriðja bylgja faraldursins.
„Allan faraldurinn hefur þetta verið eina markmið ríkisstjórnarinnar, að verja ferðaþjónustuna þannig að hún taki aftur við fyrra hlutverki í íslensku efnahagslífi eftir faraldurinn. Ekkert plan B. Þannig hefur allt þetta kjörtímabil verið, breið pólitísk stjórn um óbreytt ástand í stað þess að leysa þau samfélagslegu vandamál sem blasa við okkur öllum,“ segir Björn.
Hann bendir á að enn er skortur á húsnæði, mannekla í heilbrigðiskerfinu, engar breytingar í sjávarútvegi, enn gömul stjórnarskrá og „gamlir flokkar en samt engar lausnir fyrir gamla fólkið okkar“.
„Síðastliðnir 16 mánuðir voru fullkomið tækifæri til að renna fleiri stoðum undir íslenskt efnahagslíf. Tækifæri til að hjálpa fólki að gera hugmyndir sínar að veruleika, í stað þess að takmarka veruleikann við hugmyndir ríkisstjórnarinnar,“ segir Björn.
Hann spyr hvort við þurfum að þola annað kjörtímabil af gömlum geðþóttastjórnmálum þar sem öll eggin eru sett í sömu gömlu körfuna hjá sömu gömlu sérhagsmununum.
„Fram undan eru átök við fleiri stór úrlausnarefni, eins og loftslagsvá og sjálfvirknivæðingu, og miðað við þröngsýni stjórnvalda í faraldrinum er ljóst að framtíðin getur aldrei orðið á þeirra forsendum. Breytingar eru nauðsynlegar,“ segir hann að lokum.
