Kristján Þór Júlíusson, sjávarútvegs- og landbúnaðarráðherra, segir Samherja ekki hafa gert hreint fyrir sínum dyrum varðandi framgöngu fyrirtækisins í Namibíu sem greint var frá í Samherjaskjölunum. Þetta kom fram í viðtali sem birtist við ráðherrann í Morgunblaðinu í dag í tilefni Sjómannadagsins. Kristján Þór hefur verið harðlega gagnrýndur fyrir tengsl sín við fyrirtækið en hann hefur lýst sig vanhæfan til að fjalla um mál sem taka beint til fyrirtækisins.

„Það er ákaflega dapurt, svo ekki sé sterkara að orði kveðið, að horfa upp á þessa stöðu sem hefur byggst upp í kringum þetta ágæta fyrirtæki. Ég sagði það strax þegar þetta mál hófst að forsvarsmenn þess yrðu að ganga fram fyrir skjöldu og greina þessa stöðu og gera hreint fyrir sínum dyrum. Ég held að flestir sem fylgjast með þessari umræðu geti verið sammála um að það hafi fyrirtækinu ekki tekist enn þann dag í dag.“

Kristján segist þó ekki þekka til þeirra ásakana sem bornar hafa verið upp gegn fyrirtækinu.

„Ég hef í þessari umræðu verið samsamaður viðbrögðum fyrirtækisins við þessu máli. Í pólitík er ekkert spurt um hvort það sé sanngjarnt eða ekki, en ég hef frá fyrsta degi lagt mig fram um að svara þeim spurningum sem að mér hefur verið beint. Þau svör hafa meira snert fyrri aðkomu mína að fyrirtækinu, þá helst þá staðreynd að ég sat þarna í stjórn fyrir rúmlega tveimur áratugum, en ekki þær ásakanir sem hafa komið fram á hendur fyrirtækinu enda þekki ég þau mál ekki neitt.“

Segir hann vont að umræðan um Samherja hafi smitað út frá sér og haft áhrif á heila atvinnugrein.

„Eins frábærum árangri og íslenskur sjávarútvegur hefur náð á undanförnum árum og áratugum, þá felur þessi staða í sér að hún veikir tiltrú fólks til sjávarútvegsins sem er mjög slæmt.“