Brynjar Níelsson, þingmaður Sjálfstæðisflokksins, er búinn að fá niðurstöðu úr seinni sýnatöku vegna COVID-19 og reyndist neikvæður. Hann fagnaði niðurstöðunni með því að fara í Ríkið.
Hann hefur þó ekki fengið boðun í bólusetningu líkt og borgarstjóri. Brynjar gerir þessu skil í færslu á Facebook á gamansaman hátt, líkt og hann er orðinn þekktur fyrir.
„Þá er komin neikvæð niðurstaða úr seinni skimun hjá mér. Hún gat auðvitað ekki orðin önnur enda ekkert jákvætt sem kemur frá þér, sagði Óli Björn, vinur minn. Hljóp strax í hina ríkisreknu smásöluverslun, sem er mér svo kær. Hugsið ykkur allar hörmungarnar sem myndu dynja á þjóðinni ef einkaaðilar rækju slíka verslun.
Ég hef ekki fengið boðun í bólusetningu, eins og Borgarstjórinn, þótt ég hafi lært heilsufræði í gamla daga eins og hann. Borgarstjóra er greinilega gert hærra undir höfði en þingmönnum. Sennilega rétt hjá Þorvaldi Gylfasyni að spillingin sé grasserandi.“
Brynjar skellti sér til Spánar um páskana til að heimsækja bróður sinn, Gústaf Níelsson. Fékk hann fyrir vikið yfir sig nokkra gagnrýni fyrir að ferðast þegar landsmönnum væri almennt ráðið gegn því. Meðal þeirra sem gagnrýndu ferðalagið var Kári Stefánsson, forstjóri Íslenskrar erfðagreiningar, en Kári sagði Brynjar reka fingur framan í sóttvarnaryfirvöld með hegðun sinni og slíkt væri ekki æskilegt.