Samtals eru nú 210 einstaklingar á launaskrá hjá Alþingi Íslendinga og fór launakostnaðurinn yfir þrjá milljarða í fyrra. Hann hefur aldrei verið hærri.
Í svari við fyrirspurn DV um fjölda starfsmanna og launakostnað segir Auður Elva Jónsdóttir, fjármála- og rekstrarstjóri á skrifstofu Alþingis, að 119 manns séu nú í 106 stöðugildum hjá Alþingi, utan þingmanna, aðstoðarmanna og starfsmanna þingflokkanna.
Til viðbótar við þá 119 starfsmenn fá formenn stjórnarandstöðuflokkanna hver um sig aðstoðarmann sem þingið greiðir. Stjórnarandstöðuflokkarnir eru fimm. Þá eru 25 stöðugildi sem skiptast á milli þingflokkanna eftir atkvæðavægi, og er D’Hondt reglan notuð hér eins og við útdeilingu þingsæta. Stöðugildin voru 21 árið 2020 en fjölgaði um fjóra um síðustu áramót.
Sjálfstæðisflokkurinn fær fimm, en nýtir sér aðeins fjóra. Vinstri grænir fá fjóra en nýta sér aðeins þrjá. Framsóknarflokkurinn, Samfylkingin, Miðflokkurinn og Píratar fá allir þrjá starfsmenn og eru öll stöðugildin nýtt. Þá fá Viðreisn og Flokkur fólksins sitthvora tvo starfsmennina.
Þá eru þingmennirnir sjálfir, 63 talsins, ótaldir.
Samtals kostar starfsmannahaldið þingið rúma þrjá milljarða, sem fyrr segir. Starfsfólk skrifstofu Alþingis kostaði rúman 1,4 milljarð, starfsfólk þingflokka 355 milljónir og þingmennirnir 1,3 milljarða, tæpa.
Þá skal þess auðvitað getið að ráðherrar í ríkisstjórninni fá allir sína aðstoðarmenn sem ráðuneytin greiða og eru laun þeirra ekki inni í þessari tölu. Allir ráðherrar utan eins eru jafnframt þingmenn.
Fjölda þingmanna og starfsfólk þingflokka má sjá hér að neðan:
Sjálfstæðisflokkur: 16 þingmenn – 4 starfsmenn þingflokks – 10 aðstoðarmenn ráðherra
Vinstri grænir: 9 þingmenn – 3 starfsmenn þingflokks – 6 aðstoðarmenn ráðherra
Miðflokkurinn: 9 þingmenn – 1 aðstoðarmaður formanns – 3 starfsmenn þingflokks
Framsóknarflokkurinn: 8 þingmenn – 3 starfsmenn þingflokks – 6 aðstoðarmenn ráðherra
Samfylkingin: 8 þingmenn – 1 aðstoðarmaður formanns – 3 starfsmenn þingflokks
Píratar: 7 þingmenn – 1 aðstoðarmaður formanns – 3 starfsmenn þingflokks
Viðreisn: 4 þingmenn – 1 aðstoðarmaður formanns – 2 starfsmenn þingflokks
Flokkur fólksins: 2 þingmenn – 1 aðstoðarmaður formanns – 2 starfsmenn þingflokks
Þrír flokkar eru þannig með jafnmarga eða fleiri aðstoðarmenn en þingmenn. Flokkur fólksins er með 3 starfsmenn á kostnað þingsins, en aðeins tvo þingmenn. Framsóknarflokkurinn er með sex aðstoðarmenn ráðherra og þrjá starfsmenn þingsins, samtals níu starfsmenn fyrir þingmennina átta. Loka eru Vinstri grænir einnig með sex aðstoðarmenn ráðherra og þrjá þingmenn eða samtals níu starfsmenn fyrir jafnmarga þingmenn. Hér þarf þó að taka fram að umhverfisráðherra Vinstri grænna er utanþingsráðherra.
Minnsta aðstoð fær Miðflokkur og Samfylkingin. Samfylking er með samtals fjóra starfsmenn fyrir sína átta þingmenn, eða 50% og Miðflokkur með fjóra starfsmenn fyrir sína níu þingmenn, eða 44%.