Huginn Þór Jóhannsson, formaður Ungra Pírata, býður sig fram í prófkjöri Pírata fyrir alþingiskosningarnar 2021 í Reykjavíkurkjördæmi. Þetta kemur fram í tilkynningu frá Hugin.
Hann var formaður Nemendasambands Tækniskólans (NST), sem eru stærstu nemendasamtök landsins fyrir utan Samband íslenskra framhaldsskólanema, auk þess sem hann stofnaði þar Hinsegin félagið Heið.
„Ég var yngsti Píratinn til að komast í stjórn í aðildarfélagi innan Pírata en árið 2016 var ég kjörinn sem varamaður í stjórn ungra Pírata, þá einungis 15 ára gamall. Síðan þá hef ég setið í stjórn Pírata í Reykjavík og áfram haldið að vera í stjórn Ungra Pírata og í dag er ég formaður Ungra Pírata,“ segir í tilkynningu.
Þá hefur Huginn keppt í MORFÍS og verið í stjórn félagsins, setið í ungmennaráði UN Women, auk fleiri félagsstarfa.
„Reynsla mín og þekking endar þó ekki bara þar, því samhliða öllu þessu hef ég unnið mikið í öldrunarþjónustu með móður minni, Rannveigu Ernudóttur, og erum við, ásamt félaga okkar, Francesco Barbaccia, stofnendur Tæknilæsis fyrir fullorðna, en við hlutum hvatningarverðlaun Mannréttinda- nýsköpunar og lýðræðisráðs í desember síðastliðnum fyrir þá vinnu okkar,“ segir í tilkynningu Hugins.