Auður Anna Magnúsdóttir, framkvæmdastjóri Landverndar, gagnrýnir Kastljós fyrir meint drottningarviðtal við Hörð Arnarson, forstjóra Landsvirkjunar, á dögunum en þar sagði Hörður að Ísland ætti stóra möguleika á því að verða fyrsta ríkið í heiminum til að verða óháð jarðefnaeldsneyti. Lagði hann áherslu á áframhaldandi nýtingu jarðvarmaorku hér á landi og að útflutningur á raforku í gegnum sæstreng væri möguleiki sem skynsamlegt væri að skoða.
Auður segir að þessi stefna sé ekki sjálfbær:
„Nú þegar selja íslenskir orkuframleiðendur 80 prósent raforkunnar, sem hér er framleidd á kolefnishlutlausan, hátt til stóriðju. Öll önnur starfsemi, heimili stofnanir, samtök og svo framvegis, nota minna en 20 prósent raforkunnar. Að auka þessa raforkuframleiðslu mun ekki draga úr kolefnisspori Íslendinga, og það sem meira er, reynslan sýnir okkur að engar vísbendingar eru um að hún dragi sérstaklega úr kolefnisspori á heimsvísu.“
Hún gagnrýnir Hörð fyrir að vilja grípa til skyndilausna á sviði orkumála og minnir á ófarir kílisversins á Bakka:
„Stóra verkefni Íslands er að nýta alla þessa gríðarlegu raforkuframleiðslu með skynsamlegri hætti. Þegar kísilverið á Bakka var gangsett fékk það heimildir til að losa gróðurhúsalofttegundir út í andrúmsloftið sem auka losun Íslands um 8 prósent ári. Beinn kostanaður ríkissjóðs af Bakka hefur verið metinn upp á 4,2 milljarða króna. Tap íslenskra lífeyrissjóða og banka af Bakka stendur í 11,6 milljörðum. Þetta er gjaldþrota stefna.“
Auður sakar Kastljós um að hleypa einhliða umræðu inn í þáttinn án gagnrýninna spurninga, í þessu tilviki.
