Sjónvarpsmaðurinn Gísli Marteinn Baldursson er á þeirri skoðun að laun Alþingismanna séu of há.

„Kannski moðvolg skoðun en mér finnst þingmenn á óþarflega háum launum. Klisjan um að við fáum svo frábært fólk með því að hækka launin er ekkert endilega rétt. Besta fólkið á þingi væri þar líka þótt launin væru „bara“ milljón á mánuði,“ segir Gísli Marteinn á Twitter-síðu sinni.

Rétt er að geta þess að þingfarakaup er í dag 1.285.411 kr. auk þess sem þingmenn fá margskonar aðrar skattfrjálsar greiðslur eins og fastan ferðakostnað (30 þúsund krónur) og fastan starfskostnað (40 þúsund krónur) auk þess sem landsbyggðarþingmenn fá húsnæðis- og dvalarkostnað greiddan (134 þúsund krónur). Þá bætast við ýmsar álagsgreiðslur, til dæmis fá ráðherrar rúmlega 2,1 milljón króna á mánuði í laun og formenn þingflokka sem ekki eru ráðherrar fá 50% launahækkun eða rúmlega 1,9 milljón króna á mánuði.

Segja má að skiptar skoðanir séu um ágæti þessar skoðunar sjónvarpsmannsins. Einn bendir á að álagið og áreiti á þingmönnum sé slíkt að auðvelt sé að réttlæta launin en Gísli Marteinn lætur þó engan bilbug á sér finna.

„Ég er ekki að gera lítið úr álaginu og áreitinu. En ég held bara að milljón á mánuði myndi sannarlega duga til að fá hugsjónafólkið sem brennur fyrir að breyta samfélaginu til að gefa kost á sér. Það hefur margoft komið fram að þetta eru há laun í samanburði við evrópuþjóðir.“

Kannski moðvolg skoðun en mér finnst þingmenn á óþarflega háum launum. Klisjan um að við fáum svo frábært fólk með því að hækka launin er ekkert endilega rétt. Besta fólkið á þingi væri þar líka þótt launin væru „bara“ milljón á mánuði.

— Gísli Marteinn (@gislimarteinn) October 5, 2021