Rósa Björk Brynjólfsdóttir sækist eftir að leiða lista Samfylkingarinnar í Suðvesturkjördæmi. Þetta kemur fram í tilkynningu frá Rósu.
„Það kjördæmi þekki ég vel enda þingmaður þess frá 2016. Ég hef fulla trú á að stefna og sýn Samfylkingarinnar eigi mikinn hljómgrunn hjá kjósendum í Suðvesturkjördæmi, sem og annars staðar og mun ég leggja mig alla fram um að vinna vel í þágu þeirra, nú sem áður. Ég hlakka til að takast á við krefjandi en spennandi verkefni á næsta kjörtímabili,“ segir Rósa í tilkynningunni.
Rósa var kjörin á þing fyrir Vinstri græn í maí 2016. Hún sagði skilið við flokkinn í september á síðasta ári eftir að ríkisstjórnin ákvað að grípa ekki inn í eftir að ákveðið var að að vísa egypskri barnafjölskyldu úr landi. Rósa var utan þingflokka um tíma en gekk til liðs við Samfylkinguna í desember.