Guðmundur Ingi Guðbrandsson, umhverfis- og auðlindaráðherra var í einlægu viðtali við Morgunblaðið. Þar opnar hann sig um æskuna og hvernig það var að koma út úr skápnum sem samkynhneigður.
Skrítið barn
Hann er alinn upp í sveit, Brúarlandi á Mýrum og hafði þar ömmu sína og föðurbróður í næsta húsi. Guðmundur segir að vel megi segja að hann hafi ekki verið hefðbundið barn.
„Amma var með græna fingur og átti stóran garð. Hún kenndi mér að spila og var mjög ættrækin. Við vorum bæði mjög áhugasöm um ættfræði og borgfirskar æviskrár voru biblía þeirra fræða í minni sveit. Þegar ég var níu og tíu ára lá ég yfir þeim,“ segir hann og brosir út í annað. Já, þú mátt alveg segja að ég hafi verið skrítið barn.“
Hann greinir frá því að hann hafi verið í grunnskóla á Varmalandi og á þeim tíma voru börn þar í heimavist frá unga aldri.
„Ég átti mjög erfitt með þetta og leið mjög illa í skólanum. Ég var með heimþrá og vildi vera hjá mömmu og pabba. Það gilti um fleiri en mig, þótt það væri vel haldið utan um okkur í skólanum. En ég var bara lítill. Svo þegar ég var tíu ára tók ég þá ákvörðun að láta mér líða vel. Ég ákvað að hætta að gráta í skólanum. Það var virkilega erfitt. Mér tókst það og ég er stoltur af því enn þann dag í dag því þetta breytti lífi mínu til hins betra.“
Hann segir þetta besta ákvörðun sem hann hafi tekið í lífinu og minnir sig oft á hana þegar hann tekst á við áskoranir í lífinu.
„Maður hefur heilmikið um það að segja hvernig manni líður og hvaða viðhorf maður hefur.“
Erfitt að koma út úr skápnum
Guðmundur fór í Hússtjórnarskólann í Reykjavík eftir menntaskóla sem mörgum þótti sérkennilegt á þeim tíma.
„Ég held það hafi verið ábyrgðartilfinningin sem ýtti mér þangað. Mér fannst að ég þyrfti að læra ákveðin undirstöðuatriði áður en ég færi út í lífið. Það hljómar ótrúlega dramatískt.Ég lærði hannyrðir og matseld og að geyma mat og nota afganga. Í heimi þar sem matarsóun er alltof mikil og fötum hent í stað þess að gera við þau nýtist þetta nám svo sannarlega og ég bý enn að þessu.“
Eftir það fór hann í klaustur á Þýskalandi þar sem hann pússaði krossa af miklum móð í þrjá mánuði. Hann nam svo líffræði í háskóla og fór í framhaldsnám í Yale í Bandaríkjunum. Þar kom hann út úr skápnum, 27 ára gamall. Hann segir að engum í fjölskyldu hans hafi grunað að hann væri samkynhneigður en það kom hins vegar ekki öllum vinum hans á óvart.
„Það var svolítið erfitt. Ég hafði áhyggjur af öllum í kringum um mig; hvernig samfélagið myndi taka þessu. Ég átti konu á þessum tíma sem ég hafði verið með í sjö ár. Það var erfiðast gagnvart henni. Mér þótti og þykir ofboðslega vænt um hana og fannst þetta mjög ósanngjarnt gagnvart henni.“