Ríkisstjórnin samþykkti á fundi sínum í morgun tillögur flóttamannanefndar um að taka á móti 120 afgönskum flóttamönnum og veita þeim hæli á Íslandi, í kjölfar valdatöku Talíbana í landinu. Fréttablaðið greinir frá.

Ekki er víst að takist að koma þessu fólki frá Afganistan þar sem aðstæður eru erfiðar. „Við ráðgerum 120 en þetta er ekki nákvæmar tölur vegna aðstæðna í Afganistan. Það er engin eiginlega starfsemi á flugvellinum og það gæti verið erfitt að ná til fjölskyldnanna,“ segir Ásmundur Einar Daðason félags- og barnamálaráðherra, í viðtali við Fréttablaðið.

Lögð verður áhersla á að taka á móti fólki sem vann fyrir Atlantshafsbandalagið og fjölskyldum þeirra og verður þar horft sérstaklega til þeirra sem störfuðu með íslensku íslensku friðargæslunni. Tillögur flóttamannanefndar sem ríkisstjórnin samþykkti eru annars eftirfarandi:

• Tekið verður á móti starfsfólki sem vann með og fyrir Atlantshafsbandalagið, ásamt mökum þeirra og börnum. Horft verður sérstaklega til þeirra sem störfuðu með íslensku friðargæslunni.  
• Fyrrverandi nemendum frá Afganistan við jafnréttisskóla Sameinuðu þjóðanna á Íslandi, ásamt mökum og börnum, verður boðið til landsins.
• Íslensk stjórnvöld munu aðstoða þá Afgana sem eiga rétt á fjölskyldusameiningu eða eru komnir nú þegar með dvalarleyfi hér á landi en geta ekki ferðast á eigin vegum að komast til landsins. Um er bæði að ræða einstaklinga sem hafa fjölskyldutengsl hér sem og einstaklingar sem hyggjast hefja hér nám.
• Umsóknir um fjölskyldusameiningu, samkvæmt lögum um útlendinga, við Afgana búsetta hér landiverða settar í forgang og aukið við fjárveitingar til þess að hraða umsóknunum.