Hildur Björnsdóttir, borgarfulltrúi Sjálfstæðisflokksins og lögmaður, kallar eftir endurskoðun á reglum um sóttkví barna í leik- og grunnskólum borgarinnar. Leggur hún til að skoðað verði að nota hraðpróf sem myndi skera úr um hvort grípa þyrfti til sóttkvíar.
Hildur er ein fjölmargra sem stigið hafa fram undanfarið og lýst yfir efasemdum um framtíðarsýn Þórólfs Guðnasonar, en miðað við yfirlýsingar hans og heilbrigðisyfirvalda er engra breytinga á vænta á takmörkunum innanlands. Ef eitthvað, hefur Þórólfur ítrekað hótað harðari takmörkunum á landsmenn.
Fyrr í dag sagði DV frá því að Halldór Benjamín Þorbergsson, framkvæmdastjóri Samtaka atvinnulífsins hefði kallað eftir samskonar endurskoðun á sóttvarnareglum í aðsendri grein á Vísi í morgun.
Hildur ritar sína færslu á Facebook síðu sína, þar sem hún bendir jafnframt á að hvergi sé beitt eins hörðum aðgerðum og hérlendis, þrátt fyrir gríðarlega mikla þátttöku í bólusetningum.
Skólastjórnendur hafa þegar lýst áhyggjum af núverandi fyrirkomulagi og áhrifum þess á skólastarf. Sennilega hafa engir farið verr úr þessum faraldri en börn og ungmenni sem hafa mátt þola verulega röskun á stórum hluta skólagöngunnar. Jafnframt hafa Samtök atvinnulífsins lýst áhyggjum af núverandi fyrirkomulagi sóttkvíar, og þeim stórkostlegu takmörkunum sem fyrirkomulagið mun óhjákvæmilega hafa á skólahald í vetur, með tilheyrandi raski fyrir fólk, fjölskyldur og vinnustaði þeirra.
Hildur segir þá jafnframt að erfitt sé að benda á þá almannahagsmuni sem eiga að réttlæta svo víðtæka beintug sóttkvíar, enda sé um að ræða verulegt inngrip í daglegt líf fólks. „Nágrannalöndin beita öll vægari úrræðum – beina því til fólks að fara varlega, vernda viðkvæma hópa en reyna eftir megni að forða daglegu lífi barna frá neikvæðum áhrifum faraldursins,“ skrifar Hildur enn fremur.
„Við höfum staðið okkur vel í baráttunni við veiruna. Þátttaka í bólusetningum hefur verið góð og bóluefnin hafa skilað þeim mikilvæga árangri að draga verulega úr alvarlegum veikindum. Það er tímabært að líta björtum augum til framtíðar og opna dyrnar að hinu eðlilega lífi,“ segir hún að lokum.
