„Sjálfstæðismenn hljóta að ræða hvort það sé fullreynt að ná árangri með núverandi formanni og forystu,“ segir Páll Magnússon, fráfarandi þingmaður flokksins, í viðtali við Fréttablaðið í dag.
Grein sem Páll skrifaði í Morgunblaðið í sumar vakti mikla athygli en þar gagnrýndi hann flokk sinn mjög harðlega. Sjálfstæðisflokkurinn var fyrr á árum með um 35-40% fylgi en hefur með um 25 prósenta fylgi frá hruni.
Páll segir að flokkurinn hafi verið svo lengi við stjórn að hann sé orðinn eins og einskonar framkvæmdastjóri Íslands og helsta vandamál hans sé afstöðuleysi. Viðreisn taki fylgi frá flokknum til vinstri en Miðflokkurinn til hægri. Sjálfstæðisflokkurinn þori ekki að taka afstöðu í umdeildum málum. Hann vill að flokkurinn þori að taka afstöðu með þjóðlegum gildum og að hann eigi að hafa forystu um að sníða agnúa af fiskveiðistjórnunarkerfinu.
Páll segir í viðtalinu: „Í Sjálfstæðisflokknum hefur skapast andrými fyrir þá skoðun að þú sért að bregðast flokknum með því að gagnrýna forystuna. Ég vil hins vegar meina að þú sért að bregðast með því að gera það ekki þegar þörf er á, eins og nú er.“
Segir Páll að á meðan flokksmenn þori ekki að gagnrýna forystuna opinskátt sé pískrað á göngum.
Hann segir ennfremur: „Hollusta við formann má ekki breytast í meðvirkni, því þá er hún skaðleg. Sjálfstæðismenn hljóta að ræða hvort það sé fullreynt að ná árangri með núverandi formanni og forystu.“
Páll segist þó ekki vera þeirrar skoðunar að núverandi forysta eigi að víkja en umræðan sé nauðsynleg.
