Sú ákvörðun Landspítalans að veita ekki upplýsingar um hvort inniliggjandi sjúklingar með Covid-19 séu bólusettir eða ekki hefur vakið blendin viðbrögð. Landspítalinn ber við persónuverndarsjónarmiðum þegar um er að ræða svo fáa sjúklinga eins og raun ber vitni í dag.
Farið er yfir málið í leiðara Morgunblaðsins í dag og bent á að opin upplýsingagjöf stjórnvalda um faraldurinn hafi hingað til verið ein af forsendum þess að svo mikil sátt hefur ríkt um sóttvarnaaðgerðir. Síðan segir:
„Smit hafa breiðst hratt út undanfarið eftir að hið bráðsmitandi delta-afbrigði af kórónuveirunni barst hingað til lands. Í Morgunblaðinu í gær var sagt frá því að Landspítalinn hefði tilkynnt á fimmtudag að ekki verði gefnar upplýsingar um það í einstökum tilvikum hvort innlagðir sjúklingar með kórónuveiruna hafi verið bólusettir eða ekki óski fjölmiðlar eftir. Var sú skýring gefin að þetta væru svo fáir einstaklingar og slíkar upplýsingar gætu orðið til þess að starfsfólk á sjúkrahúsinu vissi meira um þá, en það ætti að vita. Sagði þó að færi innlögnum að fjölga yrði bólusetningarstaða gefin út í samráði við sóttvarnalækni.“
Morgunblaðið bendir á að ef því væri komið á framfæri að þeir sem hafa veikst alvarlega af veirunni væru óbólusettir gæti það orðið til að hvetja þá sem enn hafa ekki farið í bólusetningu að láta verða af því.
Segir einnig að á ritstjórn Morgunblaðsins hafi orðið vart við óánægju frá heilsbrigðiskerfinu með fréttaflutning þess efnis að hlutfall smitaðra með engin eða væg einkenni sé 97% því slíkar fréttir gætu vakið efasemdir um sóttvarnaaðgerðir. Morgunblaðið bendir á að upplýsingarskortur veki tortryggni en ekki upplýsingasgjöf:
„En það á ekki og má ekki vera hlutverk heilbrigðiskerfisins að vera í áróðursstarfi varðandi stefnumörkun og aðgerðir. Við verðum einmitt að geta reitt okkur á að þar láti menn vísindin og gögnin ráða ferð, en ekki síður að þar gæti fyllstu hreinskilni líkt og góðir læknar temja sér.
Upplýsingagjöf vekur ekki tortryggni. Það gerir skortur á upplýsingum.“
