Fréttablaðið skýrir frá þessu í dag og vísar í nýja greiningu Samtaka iðnaðarins. Fram kemur að tæplega 20% af húsnæði sé atvinnuhúsnæði en 56% af heildarfasteignaskatti í landinu sé lagt á það. Vegin meðalskattprósenta á atvinnuhúsnæði er 1,56% en á íbúðarhúsnæði er hún 0,23%.
Tæplega helmingur sveitarfélaga er með skatthlutfallið í löglegu hámarki en það er 1,65%. Í Reykjavík er um helmingur heildarverðmætis atvinnuhúsnæðis og er borgin mjög nærri hámarkinu. Fasteignaverð hefur þrýst sköttunum upp á undanförnum áratug og sveitarfélögin hafa ekki brugðist við með því að lækka prósentuna að sögn Ingólfs Bender, aðalhagfræðings Samtaka atvinnulífsins.
Hann sagði að á síðustu sex árum hafi þessir skattar hækkað um 68% en verðmætasköpun atvinnulífsins hafi á sama tíma aðeins hækkað um 27%. „Sveitarfélögin eru að taka sífellt stærri hluta af kökunni með þessari skattlagningu. Hlutur sveitarfélaganna í hagstjórninni hefur verið að stækka og þau verða að axla sína ábyrgð. Þetta er einn af þeim hlutum sem skapa samkeppnishæfnina fyrir okkar fyrirtæki. Með lækkun skattanna væri hægt að örva efnahagslífið til vaxtar og skapa störf sem við þurfum verulega á að halda nú eftir niðursveifluna undanfarið,“ er haft eftir honum.
2019 voru tekjur sveitarfélaganna af fasteignasköttum 0,9% af landsframleiðslu en þetta hlutfall er hærra en gengur og gerist á Norðurlöndunum og í Evrópu. Í Svíþjóð og Finnlandi er hlutfallið 0,4% og í Noregi er það 0,2%.
