Markaður Fréttablaðsins skýrir frá þessu í dag. Fram kemur að rekstrarumhverfi þeirra orkufyrirtækja sem eru með álverðstengingar í raforkusamningum við stórnotendur sé mjög hagfellt núna þar sem álverð sé hátt og gengi krónunnar lægra en verið hefur undanfarin ár. „Yfirleitt hefur það farið saman að krónan er mjög sterk þegar álverð hefur náð þeim hæðum sem nú sjást, sem er neikvætt fyrir þá sem selja rafmagn í Bandaríkjadölum og gera upp í íslenskum krónum. Það er ekki tilfellið núna, þó að krónan kunni hugsanlega að styrkjast frekar þegar líður á árið. En rekstrarumhverfi okkar er afar gott um þessar mundir með tilliti til þróunar á álmörkuðum,“ er haft eftir Jóhanni Snorra Sigurbergssyni, forstöðumanni viðskiptaþróunar hjá HS Orku.
Fram kemur að reikna megi með að tekjur af raforkusölu til álvera verði rúmlega 50 milljarðar á árinu. Er um þriðjungsaukningu að ræða miðað við 2019 en síðasta ár er varla hæft sem samanburðarár vegna heimsfaraldursins.
Árið 2018 var álverð tæplega 1.800 Bandaríkjadalir á tonn en hefur hæst farið í 2.500 dollara á hvert tonn á þessu ári.
Hækkandi álver fer því langt áleiðis með að bæta upp minna aflaverðmæti þorsks hvað varðar gjaldeyristekjur. Samtök fyrirtækja í sjávarútvegi telja minni þorskkvóti muni hafa í för með sér 17 milljarða í tapaðar gjaldeyristekjur.
