Brynjar Níelsson, þingmaður Sjálfstæðisflokksins, sakar flokkssystkini sín um ofsafengin viðbrögð við yfirlýsingum Haraldar Benediktssonar um að hann muni ekki sætta sig við annað sætið ef það kemur í hlut hans í prófkjöri flokksins í Norðvesturkjördæmi.
Þá segir Björn Leví Gunnarsson, þingmaður Pírata, framsetningu Haraldar heiðarlega og sakar þá sem hafa gagnrýnt hann um að endurskrifa söguna.
Haraldur Benediktsson er um þessar mundir í prófkjörsslag við Þórdísi Kolbrúnu Reykfjörð Gylfadóttur, ferðamála- iðnaðar- og nýsköpunarráðherra, í prófkjöri Sjálfstæðisflokksins í Norðvesturkjördæmi. Sjálfur er Haraldur oddviti flokksins í kjördæminu.
Hann gaf það út í gær að hann myndi ekki þiggja annað sætið, en sú yfirlýsing hefur verið harðlega gagnrýnd, þá sérstaklega af sjálfstæðiskonum í kjördæminu. Rósa Guðmundsdóttir, formaður bæjarráðs Grundarfjarðar og bæjarfulltrúi Sjálfstæðisflokksins var ein þeirra sem gagnrýndi Harald og spurði: „Getur Haraldur Benediktsson ekki keppt við konu án hótana?“
Í færslu sem Brynjar Níelsson birti á Facebook segist hann undrast ofsafengin viðbrögð nokkurra flokkssystkina sinna. Hann talar um gagnrýnina í garð Haraldar sem upphlaup sem hafi að markmiði að hafa áhrif niðurstöðu prófkjörsins. Þá heldur Brynjar því fram að „freki kallinn“ sé ekki Haraldur, og gefur sterklega til kynna að þessi umræddu flokkssystkini sín séu í raun „freki kallinn“.
„Ég undrast mjög ofsafengin viðbrögð nokkurra flokksystkina minna við heiðarlegu svari Haraldar Benediktssonar um að hann léti gott heita ef honum yrði hafnað í prófkjöri sem áframhaldandi oddvita sjálfstæðismanna í Norðvestur kjördæmi. Þetta hefur legið fyrir í marga mánuði og verið á flestra vitorði. Þessi upphlaup núna eru augljóslega til þess að hafa áhrif niðurstöðu prófkjörsins. Freki kallinn í þessari sögu er ekki Haraldur Benediktsson. Hann gerði ekkert annað en að segja satt aðspurður. Það er allur glæpurinn.“
Björn Leví spyr hvers vegna skilaboð Haralds séu túlkuð sem hótun, en sjálfum finnist honum framsetningin heiðarlega gagnvart kjósendum.
„Haraldur segir:„Ég er reiðubúinn að gera það áfram. Feli flokksmenn öðrum það hlutverk er það skýr niðurstaða.Það getur ekki verið gott fyrir nýjan oddvita að hafa þann gamla í aftursætinu.“Af hverju er þetta túlkað sem hótun? Mér finnst þetta bara mjög heiðarleg framsetning sem kjósendum er boðin upp á _áður_ en kosið er. Auðvitað eiga frambjóðendur að láta kjósendur vita hvað atkvæði þeirra mun þýða þegar talið er upp úr kjörkössunum (þetta er vægt skot á flokka sem fara óbundnir til kosninga).
En svona er pólitíkin víst, það er alltaf verið að reyna að endurskrifa söguna og leggja öðrum orð í munn.“