„Nú er einn bekkjarbróðir minn í X-bekknum í Menntaskólanum í Reykjavík fallinn í valinn. Gunnar vann stórvirki, á meðan hann var bæjarstjóri í Kópavogi, enda var nauðsynlegt að taka þar til hendinni. Þar naut dugnaður hans og útsjónarsemi sín vel,“ segir Hannes Hólmsteinn Gissurarson prófessor í eftirmælum um Gunnar Birgisson á Facebook-síðu sinni.
Eins og við greindum frá í morgun lést Gunnar Birgisson, fyrrverandi alþingismaður og bæjarstjóri, á heimili sínu í gær.
Gunnar, sem fæddist árið 1947, var bæjarstjóri í Kópavogi 2005 til 2009. Hann var bæjarstjóri Fjallabyggðar frá 2015 til 2019 og gegndi stöðu sveitarstjóra Skaftárhrepps tímabundið á síðasta ári. Hann var alþingismaður Reyknesinga frá 1999 til 2003 og Suðvesturkjördæmis frá 2003 til 2006. Hann átti sæti í fjölda nefnda og stjórna og gegndi ýmsum trúnaðarstöðum á þeim vettvangi.
Guðbjörn Guðbjörnsson, yfirtollvörður og óperusöngvari, segir að Gunnar hafi gert bæjarfélagið Kópavog að því flaggskipi sem það er í dag. Gunnar hafi verið afburðamaður sem aðrir reyndu að halda niðri:
„Ég dáðist alla tíða að Gunnari Birgissyni, fyrrverandi bæjarstjóra í Kópavogi, sem gerði bæjarfélagið að því flaggskipi sem það er í dag.
Enginn bæjar- eða borgarstjóri fyrr eða síðar er með tærnar þar sem hinn stórhuga Gunnar var með hælana og þá hvað kraft og uppbyggingu varðar, nema auðvitað Davíð Oddsson og Gunnar Thoroddsen.
Ég þekki einn af starfsmönnum sem vann á bæjarskrifstofunni. Viðkomandi gaf honum toppeinkunn og sagði að hann hefði verið fyrstur á bæjarskrifstofuna á morgnana og síðastur úr húsi á kvöldin, en aldrei þreyttur.
Að sjálfsögðu var séð fyrir því að Gunnar fengi ekki þá framgöngu á Alþingi sem hann átti skilið. Menn hafa vit á að halda mönnum eins og Gunnari niðri.
Meðalmennskan er alltaf söm við sig.“
Undir færslu Guðbjörns minnast margir Gunnars með stuttum en hjartnæmum hætti. Þór Jónsson fjölmiðlamaður segir:
„Þetta er sorgardagur. Mikill vinur minn fallinn frá.“