Katrín Jakobsdóttir, forsætisráðherra og formaður Vinstri grænna, var upplýst um ámælisverða hegðun Kolbeins Óttarssonar Proppé, þingmanns flokksins, fyrir um það bil ári. Málið varðaði hegðun hans gagnvart konu, en auk þess hafa reynslusögur fleiri kvenna af honum verið á kreiki undanfarin misseri, bæði innan og utan flokksins. Frá þessu greinir Kjarninn.

Fagráði Vinstri grænna barst kvörtun vegna Kolbeins í mars, sem á endanum varð til þess að í síðasta mánuði greindi hann frá því að hann hygðist hætta í stjórnmálum. Ástæðan sem hann nefndi var slæm framkoma hans gagnvart konu. Það var þó annað mál sem Katrín var upplýst um fyrir ári síðan.

Kjarninn vísar í skrifleg svör Katrínar, en hún hvorki játar né neitar að hafa verið gert viðvart um ámælisverða háttsemi Kolbeins fyrir ári síðan. Þá segir hún að hún yrði bundin trúnaði myndi einhver leita til hennar í máli sem þessu.

Þá er einnig greint frá því að daginn sem Kolbeinn tilkynnti um brottför sína úr stjórnmálum hafi hegðun hans verið rædd í lokuðum hópi á samfélagsmiðlum. Í kjölfar þess fór skjáskot af samskiptum innan flokksins í dreifingu á meðal einstaklinga innan flokksins.