Rætt var um deilu ASÍ og flugfélagsins PLAY í þættinum Sprengisandi á Bylgjunni í morgun. Þeir Kristján Þórður Snæbjarnarson, varaforseti ASÍ, Stefán Einar Stefánsson, viðskiptaritstjóri Morgunblaðsins, og Kristján Kristjánsson þáttarstjórnandinn fóru yfir þessi mál.

Kristján sagði mikilvægt að fyrirtæki færu eftir þeim reglum sem gilda á íslenskum vinnumarkaði. Þeir kjarasamningar sem Play hafi gert við óljóst stéttarfélag uppfylli ekki þau skilyrði sem kjarasamningar eigi að uppfylla á Íslandi. Einhver hópur hafi samið einhliða við fyrirtækið. Kristján viðurkenndi þó aðspurður að stéttarfélagið sem samdi við Play sé til, það sé í fyrirtækjaskrá, en engum sögum fer af atkvæðagreiðslu félagsmanna um samninginn.

Stefán Einar Stefánsson sakaði Drífu Snædal, forseta ASÍ, um að slá vísvitandi ryki í augu fólks með þeim tölum sem hún hefur nefnt um lágmarkslaun flugfreyja og flugþjóna hjá PLAY. Mjög lágar grunnlaunatölur hafa verið nefndar, allt niður í 266 þúsund krónur á mánuði. Stefán tiltók hins vegar dæmi frá Icelandair sem sýni að grunnlaun segi lítið um kjör þessara stétta. Þannig hafi flugfreyja hjá Icelandair sem var með 299 þúsund krónur á mánuði reynst vera með um 800 þúsund krónur í heildarmánaðarlaun.

Kristján benti á að hluti aukagreiðslna væri fyrir útlagðan kostnað, aðallega ferðakostnað, og vafasamt væri að telja slíkar greiðslur til launa.

Stefán bendir á að forsvarsmenn PLAY hafi gefið út að meðallaun flugþjóna og flugfreyja verði um 500.000 á mánuði þegar allt er talið. Það séu ekki há laun en ástandið í flugheiminum núna, þar sem flest flugfélög séu lömuð, sé með þeim hætti að það hljóti að hafa áhrif á launakjör og betra verði að sækja kjarabætur síðar þegar ástandið batnar á ný með auknum ferðamannastraumi.