Páll Magnússon er ekki á leiðinni í ritstjórastarf Morgunblaðsins. Þetta staðfestir hann í Bítínu á Bylgjunni í morgun.

Páll hefur verið orðaður við starfið síðan hann tilkynnti að hann ætlaði ekki að gefa kost á sér í prófkjöri Sjálfstæðisflokksins fyrir komandi þingkosningar. Davíð Oddsson, annar ritstjóri Morgunblaðsins, er orðinn 73 ára og líklegt að hann skelli sér á eftirlaun á næstunni. Páll var sagður eiga að taka við af honum og ritstýra blaðinu ásamt Haraldi Johannessen. Þegar Páll var spurður út í þessa orðróma var svarið hans einfalt:

„Neineinei, þessi saga er svo lífseig að ég þarf að standa í rökræðum niðri í þingi út af þessu. Þar sem fólk telur sig vita. Það hefur bara enginn hringt. En þá er sagt: Ég veit nú allt um þetta.“

Páll tjáði sig þó ekki um hvað hann ætlaði sér að gera í haust þegar nýtt þing kemur saman en kosið verður 25. september næstkomandi. Spennandi verður að fylgjast með því hvað Páll ætlar sér að gera en hann fagnar 67 ára afmæli í sumar og spurning hvort hann fari á eftirlaun á undan Davíð.