Guðlaugur Þór Þórðarson utanríkisráðherra birti á Facebook-síðu sinni í gær stutta hugleiðingu í tilefni af jarðskjálftavirkni undanfarið og mögulegri hættu á eldgosi. Guðlaugur telur Sundabraut löngu tímabæra og segir áhugaleysi meirihlutans í Reykjavík á því máli vera óskiljanlegan. Þá telur hann að Skerjabraut yrði mjög til bóta:

„Verður eldgos eða ekki það er spurningin.

Eina sem við vitum að það verður eldgos á Íslandi en við vitum ekki hvenær og hversu stórt – við búum jú á virkri eldfjallaeyju. Að búa á Íslandi eru forréttindi en við verðum að taka tillit til óblíðra náttúruafla.

En gerum við það?

Við ræðum oft samgöngumál á höfuðborgarsvæðinu og ég held að við séum flest sammála um að við verðum að gera stórátak í þeim efnum. Fyrir því hef ég talað frá því að ég hóf afskipti af stjórnmálum.

En erum við að huga að öryggismálum þegar við ræðum samgöngumálin? Reykjavík er að stórum hluta byggð á nesi með stórum umferðaræðum til vesturs. Er ekki skynsamlegt að fjölga leiðum inn og út úr borginni? M.a. af öryggisástæðum.

Sundabrautin var forsenda sameiningar Reykjavíkur og Kjalarness fyrir áratugum síðan. En lítið hefur gerst fyrst og fremst vegna óskiljanlegs áhugaleysis vinstri meirihlutans í Reykjavík. Skerjabraut væri sömuleiðis mikil samgöngubót og myndi auka öryggi þeirra sem eru vestast í borginni en hún er hvergi á blaði.

Smá hugleiðingar nú þegar hættustigi almannavarna hefur verið lýst yfir vegna jarðskjálftahrinu á Reykjanesskaga.“

https://www.facebook.com/GudlaugurThorXD/posts/10157852434417023