Alþingi samþykkti í kvöld ríkisábyrgð fyrir Icelandair upp á 15 milljarða króna. Alls 39 þingmenn samþykktu frumvarp um ríkisábyrgð en átta sögðu nei. Voru það sex þingmenn Pírata auk Sigríðar Á. Andersen, þingmanns Sjálfstæðisflokksins og fyrrverandi dómsmálaráðherra, og Andrésar Inga Jónssonar, sem er utan flokka en var í VG.
Sigríður gerði grein fyrir afstöðu sinni í Facebook-færslu í kvöld. Þar segir hún að nærtækara hefði verið að draga úr takmörkunum á ferðum til landsins en að veita flugfélagi ríkisábyrgð. Ástand sem bitnað hafi mjög á félaginu sé að einhverju leyti skapað af stjórnvöldum með of stífum ferðatakmörkunum.
